28 ноября 2009 г.
Тĕлĕнмелле шăвать вăхăт. Тин кăна-ха районта çĕнĕ эстрада ушкăнĕ - «Савăнăç» йĕркеленни çинчен çырнăччĕ пек. Унтанпа вара 5 çула яхăн иртсе те кайрĕ. Çак хушăра пире мĕнпе савăнтарма пултарчĕ-ха вăл; Кун пирки унăн илемлĕх ертÿçинчен, солистран И.Филипповран ыйтрăмăр.
- Ушкăна эпир чи малтанах хамăр çырнă юрăсене халăх патне çитерме тесе йĕркелерĕмĕр (чăн та 4 çынран тăракан коллективра пурте - Л.Егорова, Т.Гаврилова, Э.Маленков, И.Филиппов (вăл профессиллĕ музыкçă пулнă япала, паллах) - сăвă-юрă çыраççĕ). Каярах пирĕн репертуар чăваш, вырăс композиторĕсен юррисемпе пунлансах пычĕ, 250ран иртрĕ. Юрă-кĕвĕн чикки çук, çавăнпа та эпир концертсемпе республикăри ялсемпе хуласене кăна мар, Тутарстан, Пушкăртстан, Оренбург тăрăхĕсене те çитсе килтĕмĕр. Хальхи вăхăтра çул çÿрев тăкакĕ сахалах мар, анчах та чăвашсем йышлăн тĕпленсе пурăнакан вырăнсене çитме тĕллев лартнă япала, ăна пурнăçлатпăрах. Официаллă сăмахпа калас пулсассăн, хамăрăн 2009-2010 çулхи концерт сезонне районти Культурăпа кану центрĕнче декабрĕн 3-мĕшĕнче иртекен концертпа уçатпăр. Сцена çинче пирĕнпе пĕрлех кулăш ăсти В.Сергеев пулĕ. Куракансем иртнĕ çулсенчи чи лайăх юрăсемпе тата хальччен илтменнисемпе паллашма пултарĕç. Ун хыççăн вара республикăри район центрĕсем тăрăх турне пуçланĕ, каярах республика тулашне те çитĕпĕр.