14 ноября 2009 г.
«Хĕрлĕ ялавăн» кашни номернех вулакансем уйрăмлăха асăрхарĕç пулĕ - хаçатăн ятне (эпир ăна логотип тетпĕр) урăх шрифтпа çырнă, сулахай енче район гербне вырнаçтарнă. Хăшĕ-пĕри çакă мĕнпе çыхăннине те чухласа илчĕ ахăр - ыран район хыпарçи тухма пуçланăранпа 78 çул çитет. 1931 çулхи ноябрĕн 15-мĕшĕнче «Трактăр» ятпа кун çути курнă вăл. Çавра дата мар та, анчах çуралнă кун пĕчĕк парне те пулса парасси пирĕнтен тухнă йăла мар. Çавăнпа та çакă хăйне евĕр парне пултăр. Ку - пĕрремĕшĕ. Иккĕмĕшĕ. Тимлĕреххисем «Хаçат - пурнăç тĕкĕрĕ» - тесе çырнине те курчĕç ĕнтĕ. Мĕн-ха вăл тĕкĕр, мĕн тума кирлĕ; Паллах хамăра сăнама, хитреленме, куракан çитменлĕхсене пĕтерме. Эпир вара пирĕн хаçат район пурнăçĕн тĕкĕрĕ пултăр тесе тăрăшатпăр. Хамăра, хамăрăн пурнăçа вăл мĕнле пур, çавăн пек кăтарттăр - çитĕнÿсене те, çитменлĕхсене. Пирĕн, сирĕн материалсем урлă хитри, ырри тата лайăхрах курăнтăр, çитменлĕхсене асăрхаттарса, пĕрле канашласа пĕтерсех пымалла пултăр. Вăрмар район хаçачĕ тесе çырнине чи çÿле, курăнакан сулахай кĕтессе лартни те ахаль мар. Редакци е пĕр-пĕр парти, ушкăн хаçачĕ мар вăл. «Хĕрлĕ ялав» - район хаçачĕ. Эппин ăна пирĕн пурин те вăй çитнĕ таран пĕрле кăлармала.
Тĕрлĕ çулсенче вара хаçат тĕрлĕ тытăмсене пăхăнса тăнă. К.Горохов тĕп редактор 1931 çулхи ноябрĕн 15-мĕшĕнче алă пусса кăларнă «Трактăр» хаçатăн пĕрремĕш номерĕ Вăрмар райкомĕпе райĕçтăвкомĕн тата райпрофсоветăн органĕ пулнă. Каярах райпрофсовет сăмаха кăларнă. 1938 çулăн иккĕмĕш çурринче хаçат «Хĕрлĕ ялав» ятпа тухма пуçлать, ун чухне вăл - ВКП (б) Вăрмар Райкомĕпе ĕççынни депутачĕсен Район Совечĕн хаçачĕ. Иртнĕ ĕмĕрĕн 50-мĕш çулĕсенче, ВКП (б) вырăнне КПСС туса хурсассăн, район хаçачĕ те КПСС Вăрмар райкомĕпе ĕççынни депутачĕсен район совечĕн хаçачĕ пулса тăрать, каярах - КПСС Вăрмар райкомĕпе халăх депутачĕсен район совечĕн хаçачĕ.
Чи пысăк улшăнусем пăлхаварлă 1991 çулта пулса иртеççĕ. Январь уйăхĕнчен вăл - халăх депутачĕсен Вăрмар район Совечĕн органĕ. Соучредительсем - КПСС райкомĕпе редакци коллективĕ. Часах КПССран Раççей коммунисчĕсем уйрăлса тухаççĕ, çавăнпа та февралĕн 12-мĕшĕнчен хаçат соучредителĕ РСФСРти компартин райкомĕ пулса тăрать. Сентябрĕн 3-мĕшĕнче тухнă 106 номерте соучредительсене палăртман, сентябрĕн 5-мĕшĕнчен редакци коллективĕ учредитель ĕçне хăй çине илнĕ.
Октябрĕн 3-мĕшĕнче хаçат титулĕпе пĕрле юлашки хут «Пĕтĕм тĕнчери пролетарисем, пĕрлешĕр!» лозунга пичетленĕ. 1991 çулхи ноябрĕн 14-мĕшĕнче «Хĕрлĕ ялав» хăйĕн 60 çулне халалласа уяв номерĕ кăларнă. Çак кунран пуçласа унăн логотипĕ айне вăл Вăрмар район хаçачĕ пулнине палăртнă. Çакă, район пур чухне, нумайлăха пулĕ тетпĕр.