14 октября 2009 г.
Çак ятпа РФ Пенси фончĕн республикăри уйрăмĕнче аудио-пресс-конференци пулчĕ. Вăл селектор канашлăвĕн мелĕпе иртрĕ. Унта Республикăри пенси уйрăмĕн управляющийĕ Р.Кондратьева, ЧР сывлăх сыхлавĕпе социаллă аталану министрĕн заместителĕ Л.Рулькова, ЧР Патшалăх Канашĕн Сывлăх сыхлавĕн, социаллă политика, физкультура тата спорт комитечĕн председателĕ О.Зайцева, «Раççей пенсионерĕсен союзĕ» общество организацийĕн регион уйрăмĕн ертÿçи В.Сапожников хутшăнчĕç.
Аудио çыхăнăва РФ Пенси фончĕн республикăри уйрăмĕпе районсенчи управленисемпе йĕркеленĕ май вĕсен ĕçĕ-хĕлĕпе вырăнти журналистсем, çавăн пекех социаллă хÿтлĕх пайĕсен специалисчĕсем паллашма пултарчĕç. Пирĕн районти пенси фондĕнче те çак кун уçă алăксен кунĕ пулчĕ. Районти социаллă хÿтлĕх пайĕн начальникĕ В.Иванов, «Раççей пенсионерĕсен союзĕ» общество организацийĕн пирĕн районти уйрăмĕн ертÿçи Р. Васильева тата районти пенси фондĕнче нумай çулсем ĕçлесе халĕ тивĕçлĕ канăва тухнă А.Кузнецова тата Вăрмар поселокĕнчи хăш-пĕр пенсионерсем те хутшăнчĕç.
Информаци марафонне республикăра пурăнакансене пенсин 2010 çулта вăя кĕрекен улшăнăвĕсене ăнлантарас тĕллевпе йĕркеленĕ. Ĕçлемен ватăсене регионта пурăнма кирлĕ чи пĕчĕк виçерен сахалтарах тупăш илекен пенсионерсене 2010 çулхи декабрĕн 1-мĕшĕнчен социаллă хушма тÿлев пама пуçласси тата ытти тĕрлĕрен çĕнĕлĕхсем пирки республикăри пенси уйрăмĕн управляющийĕ Р.Кондратьева тĕплĕн ăнлантарчĕ. Вăл Мускаври канашлура пулнă май унта хускатнă ыйтусем пирки те чарăнса тăчĕ.
Çавăн пекех вăл аудио- пресс-конференцире журналистсен ыйтăвĕсем çине те хуравларĕ.