10 октября 2009 г.
Райадминистрацин ларусен залĕнче наркотиксем сарăлассине хирĕç ĕçлекен районти комиссин черетлĕ ларăвне район пуçлăхĕ, асăннă комисси председателĕ В.Кириллов ертсе пынă. Пăхса тухмалли ыйтусен пĕлтерĕшĕ пысăк пулнă май, унăн ĕçне комисси членĕсемсĕр пуçне хăш-пĕр ял тăрăхĕсен пуçлăхĕсем, администраци пайĕсен начальникĕсем, специалистсем хутшăннă.
Чи малтанах пухăннисем «Наркотиклă япаласемпе усă курассине хирĕç тăрасси тата вĕсен çаврăнăшне чарса лартассипе 2008-2009 çулсенче Вăрмар районĕнче туса ирттермелли мерăсем çинчен» тĕллевлĕ программăна уйрăм ял тăрăхĕсенче мĕнле пурнăçланине тĕплĕнрех пĕлес тĕллевпе Тикаш тата Кĕлкеш ял тăрăхĕсен пуçлăхĕсене - В.Черкасовпа В.Данилова итленĕ.
Алă усса лармаççĕ ял тăрăхĕнчи яваплă çынсем. Халăхпа, уйрăмах çамрăксемпе, тĕл пулса наркотикла япаласен сиенĕ çинчен калаçусем ирттернисĕр пуçне çулла-кĕркунне уйрăм хуçалăхсене кĕрсе тухса мăкăнь е кантăр ÿсмест-и тесе те кĕрсе çÿреççĕ. Кĕлкешре 2005 çулта çакăн пек пĕр тĕслĕх тупса палăртнă май, Валерий Николаевич çак енĕпе уйрăмах тимленине палăртрĕ. Сиенлĕ йăла айккинче тăтăр тесен çамрăксен пушă вăхăтне пĕлсе йĕркелеме кирли, çак ĕçре культура ĕçченĕсен «шăллăрах» пулмаллине каларĕ. Комисси председателĕ милици работникĕсен витĕмлĕрех ĕçлемеллине палăртрĕ.
Калаçу пĕчĕккĕн хăех кун йĕркинчи иккĕмĕш ыйту патне çаврăнса çитрĕ. «Культура учрежденийĕсенче çул çитмен çамрăксемпе ытти çынсем хушшинче наркомание хирĕç туса ирттерекен профилактика ĕçĕсем тата сывă пурнăç йĕркине пропагандăласси» ятлă пулчĕ вăл.
Райадминистрацин культура, социаллă аталану тата архив ĕçĕн пайĕн пуçлăхĕ Г.Петрова пур культура учрежденийĕсенче те - клуб-и вăл, библиотекă-и - наркомание хирĕç, сывă пурнăç йĕркине пропагандăлас тĕлĕшпе тĕрлĕ мероприятисем ирттернине пĕлтерчĕ. Выставкăсем йĕркелеççĕ, кинопродукципе паллаштараççĕ, спорт ăмăртăвĕсен йышĕ ÿссех пырать. Кавалти, Шăплатри библиотекăсенче çак енĕпе информаци сехечĕсем ирттересси йăлана кĕнĕ. «Реклама витĕмĕ пирки те манмалла мар», - терĕ Галина Леонидовна, - Вăрмар поселокĕнче сывă пурнăç йĕркине тытса пыма чĕнекен баннер пулсан вырăнлă пулĕччĕ».
Районти шкулсенче асăннă ыйтусемпе мĕнле ĕçсем туса ирттернипе вĕрентÿпе çамрăксен политикин пайĕн специалист-эксперчĕ Г.Петрова паллаштарчĕ.
Ларăва хутшăннисем çак туса ирттерекен ĕçсем питĕ кирлĕ пулнине палăртрĕç. РФ наркотиксемпе кĕрешекен федераллă службăн Çĕнĕ Шупашкарти Управленийĕн оперуполномоченнăйĕ А.Тепеев ĕçе чакармалла маррине, яланах тимлĕ пулмаллине, пур структурăсен те милици сотрудникĕсемпе алла-аллăн тытăнса ĕçлеме кирлине каларĕ.
Ларура çавăн пекех вырăнти бюджетра наркотикпа суту-илÿ тăвакансем, ăна туса кăларакансем çинчен пĕлтерекенсене хавхалантарма укçа-тенкĕ хывса хăвармаллине палăртрĕç.