07 октября 2009 г.
Уйăх ытла иртрĕ ĕнтĕ вĕрентÿ çулĕ пуçланнăранпа. Анчах çуллахи каникул асрах-ха.
Мĕнпе асра юлчĕç-ха çуллахи кунсем? Паллах, нумайĕсемшĕн çуллахи вулав кунĕсемпе.
Юлашки çулсенче Вăрмарти ача-пăча библиотеки ятарласа тĕрлĕрен программăсемпе ĕçлеме тăрăшать. Тĕслĕхрен, ачасен çуллахи кану вăхăтĕнче библиотека ĕçченĕсем «Çуллахи куна - кĕнекепе» ятарласа хатĕрленĕ программăпа ĕçлерĕç. Программăна кĕрекен пĕр пайĕ - вулав конкурсĕ «Çуллахи чемпион-2009». Паллă ĕнтĕ, ачасем çак тапхăрта шкул программипе е чĕре туртнипе вулама юратаççĕ. Çавăнпа та конкурс виçĕ номинаципе иртрĕ: «Шкул программипе вулатăп», «Чĕре туртнипе вулатăп». Виççĕмĕш - «Кĕнеке тавра» номинацире ачасем вуласа тухнă кĕнекесем тăрăх тĕрлĕ ал-ĕç япалисем, ÿкерчĕксем библиотекăна илсе килме пултарчĕç.
Ачасем конкурса хаваспах хутшăнма кăмăл турĕç. Питĕ йышлăн та тăтăшах çÿрерĕç библиотекăна. Вулакан формулярĕсене тишкерсе тухнă хыççăн çакă паллă пулчĕ: ачасем çĕнтерÿçĕсен шутне кĕме сахал мар вăй хунă. Кам çирĕм, кам вăтăр, хĕрĕх тата ытларах кĕнеке те вуласа тухма пултарнă. Çу уйăхĕн юлашки кунĕнче вара çамрăк вулавçăсене библиотекăна кĕнеке уявне йышлăн пуçтарăнчĕç. Конкурса хутшăннă çĕнтерÿçĕсене те çак уявра библиотека ĕçченĕсем ăшшăн саламларĕç, диплом тата грамотăсем парса хавхалантарчĕç. Халĕ çĕнтерÿçĕсен ятне те палăртса хăварас килет.
«Шкул программипе вулатăп» номинацире кĕçĕн классенче вĕренекенсен хушшинче иккĕмĕш класра вĕренекен Елизавета Максимова 25 кĕнеке вуласа çĕнтерчĕ, вăтам классенче вĕренекенсем хушшинче Елена Иванова 22 кĕнеке вуласа мала тухрĕ, аслă классенче вĕренекенсем хушшинче - саккăрмĕш класра вĕренекен Татьяна Дмитриева çĕнтерчĕ.
Иккĕмĕш - «Чĕре туртнипе вулатăп» номинацине хутшăнакансен шучĕ ытла та йышлăн пулчĕ. Хăйсене кăмăла кайнă кĕнекесене вĕсем библиотекарьсемпе,тус-юлташĕсемпе час-часах сÿтсе яврĕç, пĕр-пĕрне вуласа тухма сĕнчĕç, хăш-пĕр кĕнекене черетпе вулани те пулчĕ. Çапла вара ку номинацире кĕçĕн классенче вĕренекенсем хушшинче иккĕмĕш класра вĕренекен Дарья Егорова - 39, вăтам класра вĕренекенсем хушшинче Яна Казакова - 58, аслă классенче вĕренекенсен хушшинче - Ангелина Горбунова 37 кĕнеке вуласа çĕнтерÿçĕсен шутне кĕчĕç.
«Кĕнеке тавра» номинацине хутшăнса улттăмĕш класра вĕренекен Кристина Николаева юмахри пан улми тата йĕке хÿрепе савăнтарчĕç, пиллĕкмĕш класра вĕренекен Ольга Чернова вара, вуласа тухнă кĕнеке тăрăх ытармалла мар планетăн ÿкерчĕкне хатĕрлесе диплома тивĕç пулчĕç.
Пуринчен те нумай кĕнеке вуласа çуллахи чемпион ятне илме тăваттăмĕш класра вĕренекен Агата Баракзай тивĕç пулчĕ. Вăл вара 69 кĕнеке вуласа тухма ĕлкерчĕ çак тапхăрта. Хăйĕн пĕчĕк шăллĕне Тимура та библиотекăпа туслаштарма тăрăшрĕ Агата, килте те, вулав залĕнче те тăтăшах вĕсем пĕрле кĕнеке вуларĕç.
Çакăн пек çуллахи вулав программине хутшăнни ачасен тавра курăмне, пултарулăхне ÿстерме тата библиотекăпа тачă туслашма пулăшасса эпир шансах тăратпăр. Тата çакна та палăртса хăварас килет. Кам нумай вулать, çав нумай пĕлет, вĕренÿре те малти ретре пырать. Пирĕн библиотека алăкĕсем ачасемшĕн тата вĕсен ашшĕ-амăшĕсемшĕн те яланах уçă, кĕнеке вĕсемшĕн малаллахи пурнăçра чи çывăх туссен шутĕнче пуласса эпир шанса тăратпăр.