02 сентября 2009 г.
Иртнĕ эрнере Шупашкарта И.Н.Ульянов ячĕллĕ ЧПУн культура керменĕнче вĕрентÿ ĕçченĕсен республикăри конференцийĕ иртрĕ. Унăн ĕçне пирĕн районтан педагогсен пысăк ушкăнĕ хутшăннă. Ăна райадминистрацин вĕрентÿ тата çамрăксен политикин пайĕн пуçлăхĕ Ю.Соколов ертсе пынă. Учительсен форумĕнче Чăваш Республикинчи вĕрентĕвĕн 2040 çулчченхи аталанăвĕн Стратегийĕнче палăртнă тĕллевсенчен пĕрне - чи лайăх учрежденисен тата педагогсен ырă опытне анлăн сарассине - тĕпе хучĕç. Çитĕнÿсене пĕтĕмлетнипе пĕрлех çивĕч ыйтусене те сÿтсе яврĕç, вĕсенчен хăтăлмалли майсене шырарĕç. ЧР Вĕрентÿ министерствин «Чăваш Республикинче «Пирĕн çĕнĕ шкул» наци вĕрентĕвĕн пуçарулăхне пурнăçа кĕртесси çинчен» докладне тишкерчĕç.
Чăваш Енĕн пултаруллă та пуçаруллă, самана уттинчен юлмасăр çамрăк ăрăва çирĕп пĕлÿ, тивĕçлĕ воспитани парассишĕн куллен тăрăшакан ĕçченĕсене чи малтанах Николай Федоров Президент саламларĕ. Чăваш Енре вĕрентĕвĕн хальхи инфратытăмне йĕркелесси иртнĕ ĕмĕрĕн 90-мĕш çулĕсенчех приоритетлă тĕллев пулса тăнă. Президент çакна хăш-пĕр тĕслĕхпе çирĕплетрĕ. Вунă çул хушшинче 150 яхăн çĕнĕ объект хута янă (ку - шкулсен пĕтĕмĕшле хисепĕн виççĕмĕш пайĕ), вĕсене газ, шыв кĕртнĕ, шкул автобусĕсемпе тивĕçтернĕ, çĕнĕ оборудованипе пуянлатнă, интернетпа çыхăнтарнă. Пĕлтĕр тата çак çулăн пĕрремĕш çурринче 421,4 млн. тенкĕлĕх вĕренÿ, спорт, ытти оборудовани, сĕтел-пукан тата тĕрлĕ литература туяннă. Çĕнĕ вĕренÿ çулĕнче Патреккелĕнчи тĕп тата Шăхасанти вăтам шкулсем, Çĕрпÿри 1-мĕш интернат шкулăн спорт залĕ, Чăваш ял хуçалăх академийĕн инженери факультечĕн корпусĕ хăйсен алăкĕсене уçаççĕ, Çĕрпÿри аграрипе технологи техникумĕн вĕренÿ корпусĕн строительстви вĕçленсе пырать.
Республикăри ачасен 90 проценчĕ хальхи пурнăç ыйтнине тивĕçтерекен пĕлÿ çуртĕнче ăс пухать. Раççейĕпе вара ку кăтарту 60 процентран та пĕчĕкрех. «Федераци центрĕпе пĕрле эпир ыранхи кун ыйтнине туллин тивĕçтерме пултаракан вĕренĕвĕн малашлăх тытăмĕн сĕмне палăртнипе мăнаçланма тивĕç», - терĕ Президент.
«Çĕнĕ вĕренÿ çулĕнче преподавательсен, учительсен, педагогсен коллективĕсен, вырăнти хăй тытăмлăх органĕсен, ЧР Вĕрентÿ тата çамрăксен политикин министерствин пысăк тĕллевсене пурнăçлама тивет. Вĕсене эсир ăнăçлă татса парасси пирки пĕрре те иккĕленместĕп», - терĕ Н.Федоров.
ЧР Вĕрентÿ министерствин «Чăваш Республикинче «Пирĕн çĕнĕ шкул» наци вĕрентĕвĕн пуçарулăхне пурнăçа кĕртесси çинчен» докладне сÿтсе явма конференцие пухăннисем пуçаруллă хутшăнчĕç.
Республика пуçлăхĕ вĕрентÿ ĕçченĕсене патшалăх наградисемпе чысларĕ. Вĕсем хушшинче Пысăк Енккассинчи пĕтĕмĕшле пĕлÿ паракан вăтам шкул учителĕ Татьяна Табакова пулни те залра ларакан районти ĕçтешĕсене савăнтарчĕ, мăнаçлантарчĕ.
Вĕрентĕвĕн инноваци программисене пурнăçа кĕртекен пĕтĕмĕшле пĕлÿ паракан учрежденисен республикăри конкурсĕн çĕнтерÿçисем грант свидетельствисене тивĕçрĕç.