29 августа 2009 г.
Кăçал пирĕн хуçалăх, кризиса пăхмасăрах, самай тĕрекленчĕ. Тĕш тырă тата çĕр улми çитĕнтерме акса-лартса туса илекен çĕрсен лаптăкĕ чылай пысăкланчĕ. 975 гектартан 1500 гектара çитертĕмĕр. Çавна май ĕçлекен çынсен йышĕ 17 çынна çитрĕ. Çĕр лаптăкĕ пысăкланнă май, унта ĕçлеме техника кирлĕ-çке-ха. Çемье канашĕнче эпир çапла йышăнтăмăр: «Погрузчике çакса çÿремелли урапаллă трактор туянмалла». Çĕрпÿ перекет банкĕн 4437Ÿ056 номерлĕ Вăрмарти офисĕнче (эпир тахçанхи клиентсем) пире çĕнĕ «Бизнес-Авто» кредитламалли программăна сĕнчĕç. Тепĕр эрнеренех çĕнĕ МТЗ трактор пирĕн хуçалăхăн уйĕсенче ĕçлеме пуçларĕ. Çак хăватлă тракторпа ĕçлеме Владимир Юрьевич Николаева шантăмăр. Техникăна юратакан, ĕмĕр тăрăшшĕпех ялта вăй хуракан пултаруллă механизатор техникăна тухăçлă ĕçлеттерет. Халĕ вăл кĕр тыррисем акма çĕр хатĕрлет.
Çĕр ĕçченĕн çулталăкĕнче ял хуçалăх çулне ăнăçлă вĕçлесен кредита йĕркеллех татма пулать пулĕ тесе шутлатăп.
Ялта ÿсекен çамрăк мĕн ачаранах техникăна юратни ашшĕ-амăшне чăннипех те савăнтарать. Ара, шкултан вĕренсе тухсан урамра çапкаланса çÿрени никама та килĕшмест. Владимир Николаевăн ывăлĕ - Юрий Кĕлкешри вăтам шкултах механизатор профессине туяннă. Ашшĕ çулне суйласа илнĕскер вĕренсе илнĕ специальноçпа практикăра анлăн усă курать. Шупашкарти машинăпа технологи техникумне вĕренме кĕнĕскер вăхăт пур чухне ашшĕне пулăшма тăрăшать. Хуçалăхра кăçал кĕр тыррисене 500 гектартан кая мар акса хăварма палăртнă пулсан, вăл та акма çĕр хатĕрленĕ çĕрте Беларус тракторпа ашшĕне пулăшнă çĕрте пысăк хастарлăх кăтартать. Паянхи куна 400 гектар çĕр хатĕрлесе хунă та ĕнтĕ. Кĕр тыррисене вара 200 гектар акнă.