29 августа 2009 г.
Вăрмар хула, ял тăрăхĕсен пуçлăхĕсен пĕрле сÿтсе явса татса памалли ыйтусем чылай пулчĕç çак эрнере иртнĕ канашлăвăн ларăвĕнче. Унăн председателĕ - район пуçлăхĕ В.Кириллов ларăва ертсе пычĕ.
Канашлăва пуçличчен район пуçлăхĕ В.Кириллов тăван тăрăхра тĕпленсе пурăнакан çамрăк çемьесен пĕр ушкăнне хваттер туянма тата çурт-йĕр лартма ятарлă свидетельствăсем пачĕ. Вĕсен шутĕнче Чупай ялĕнчи - Михайловсен, Мăнçырмари - Алиевсен, Вăрмар поселокĕнчи пĕр хушаматлă икĕ Александровсен çемйисем.
Райадминистрацин финанс пайĕн начальникĕ А.Енькова кăçалхи сакăр уйăхра Вăрмар хула, ял тăрăхĕсенчи бюджет еплерех пурнăçланнине тишкерчĕ. Ял тăрăхĕсене кĕрекен çулсене пăхса тăрасси тата юсасси тавра та калаçу пулчĕ. Çакăн валли уйăрнă укçана вăхăтра та тухăçлă усă курмалли пирки асăрхаттарчĕ Альбина Васильевна.
Предприятисемпе организацисенче, урамсенче тасалăхпа хăтлăх, илемлĕх хуçалантăр тесе «Хамăр алăпа илемлĕх тăвар» районти конкурс малалла пырать. Унăн пĕтĕмлетĕвĕ сентябрĕн 10-мĕшĕнче пулĕ. Çакăн çинчен райадминистрацин культура енĕпе ĕçлекен пай пуçлăхĕ Г.Петрова каласа пачĕ. Унсăр пуçне Галина Леонидовна районти культура учрежденийĕсем кĕрхи - хĕллехи тапхăра еплерех хатĕрленни çинче чарăнса тăчĕ.
Райадминистрацин строительство тата обществăлла инфратытăм аталанăвĕн пай пуçлăхĕн çумĕ А.Михайлов ЧР Саккунĕпе килĕшÿллĕн тăлăх ачасемпе пăхакансăр тăрса юлнисене хваттерпе е çуртпа тивĕçтерес енĕпе уйрăмах тимлĕ пулмалли çинчен каларĕ. Ĕçмелли шыв пирки тапратсассăн, чылай ыйту сиксе тухрĕ. Районти 260 яхăн харпăрлăхсăр, документацисĕр шыв скважинисем шутланса тăраççĕ. 2006 çултанпа çак скважинăсене ял тăрăхĕсен харпăрлăхне куçарас ĕç пуçланнă темелле, анчах паянхи кун та çак ĕçе ял тăрăхĕсем вĕçлеме вăй çитереймеççĕ. Сăлтавĕ - документаци хатĕрлеме укçа-тенкĕ çукки. Çук тенипе пур пулаймăн, ĕçне камăн та пулин тумаллах. Çавăнпа та ял тăрăхĕсен пуçлăхĕсем тупсăмне тупма шантарчĕç.
Ял тăрăхĕсен сайчĕсене тишкермеллине, вĕсенче вырнаçтарнă информацие çĕнетсех тăмаллине аса илтерчĕ райадминистрацин информаци пайĕн пуçлăхĕ А.Чернов. Районти шалти ĕçсен пайĕн хăрушсăрлăх енĕпе ĕçлекен начальникĕ А.Яранов йĕркелĕхе тытса тăрассипе çыхăннă ыйтусем çинче чарăнса тăчĕ.
Юлашкинчен канашлăва пĕтĕмлетсе район пуçлăхĕ сăмах тухса каларĕ.