22 августа 2009 г.
Хальхи вăхăтра ĕçсĕр тăрса юлнă çынсен йышĕ нумайлансах пырать. Анчах та кун пеккисене патшалăх енчен пулăшас тĕллевпе ятарласа укçа-тенкĕ те уйăраççĕ. Вĕсене пулăшмах Чăваш Республикин Правительстви тĕллевлĕ программа та туса хунă. Çак программăна туллин пурнăçа кĕртессипе районти ĕçпе тивĕçтерекен центр та тĕрлĕрен ĕçсем туса ирттерет. Вĕсен ĕçĕ пирĕн ĕçре те пулăшни куç кĕрет. Ĕç биржинче учетра тăракансене тĕрлĕ çĕрте ĕç вырăнĕсем тупса параççĕ. Çапла вара вĕсем кирлĕ вăхăтра çав тери пулăшаççĕ. Чулкас ял тăрăхĕнче пĕртен пĕр шкул çеç тăрса юлнă. Ку пурнăçпа çыхăннă пулăм-ха. 1-мĕш сентябрь çитиччен вара ăна юсаса йĕркене кĕртмелле. Ку ĕçсене пурнăçлама арçын аллисем çав тери кирлине ĕçлесе курнă çын ăнланатех. Çапла вара районти ĕçпе тивĕçтерекен центрта учетра тăракансене 3 çынна пирĕн шкула ĕçлеме ячĕç. Июнĕн 1-мĕшĕнчен тытăнса августăн 31-мĕшĕччен ĕçлеме килĕшÿ турăмăр. П.Кукин (Çитмĕш ялĕнчен), Л.Кузьминпа В.Родионов (Чулкас ялĕнчен). Вĕсен ĕçне шкулти рабочи В.Федоров йĕркелесе пычĕ. Шкула вĕренÿ çулне хатĕррине тĕрĕслеме килекен комисси те вĕсен ĕçне лайăххипе кăна хакларĕ. Çак вăхăтчен вара вĕсен самаях тар кăларма тиврĕ. Шкул спортзалне тĕпренех юсама тивнине пула ытларах унта вăй хучĕç. Урайсене сăрларĕç, шкулти сĕтел-пукансене те вĕсемпех çĕнĕрен «пурнăç пачĕç» тата ытти тĕрлĕрен çĕрте те юсав ĕçĕсем турĕç. Шкул йĕри-тавра тытнă картасене те вĕсемех юсарĕç, халĕ бордюрсене йĕркене кĕртеççĕ. Эпĕ, шкул директорĕ пулнă май, вĕсен ĕçĕпе çав тери кăмăллă, унпа пĕрлех çак программа та мана питĕ килĕшет. Обществăлла работниксем пулăшнипех шкула çĕнĕ вĕренÿ çулĕ тĕлне йĕркене кĕртрĕмĕр. Вĕсем пулăшнипе шкулта ĕçлекенсем черетлĕ отпускра канма пултарчĕç. Çак программа малашне те йĕркеллĕ ĕçлесе пырасса шанатăп.