19 августа 2009 г.
«Вăрмарти çăкăр завочĕ» тулли мар яваплă общество пурлăхпа техника базине çулсерен вăйлатса пырать. Акă иртнĕ çулсенче çăкăр пĕçерекен Ротор - АГРО кăмака 2 илнĕ пулсан, кăçал вара ĕç процесне çăмăллатма кондитер изделийĕсене чĕркесе çыхмалли оборудовани туяннă. Вăл 252 пин тенкĕ тăрать. Ăна çак общество хăйĕн укçи-тенкипе илме вăй çитернĕ. Хальхи вăхăтра ку оборудованипе А.Иванова кондитер тăрăшса вăй хурать.
«Ансат та çăмăл унпа пĕремĕк, печени тата ытти пылак апат-çимĕçсене чĕркесе çыхма. Ку изделисене 500 грамм е пĕр килограмм та чĕркеме пултаратпăр. Туянаканшăн çакă питĕ меллĕ. Унпа пĕрлех ку оборудованипе усă курни пирĕн ĕçе чылай çăмăллатать, сервис пахалăхне ÿстерет», - тет производство начальникĕ А.Яковлева.
Тутлă та техĕмлĕ пĕремĕкпе, печенипе тата ытти кондитер изделийĕсемпе райпон лавккисене, уйрăм çын предпринимательсене тивĕçтереççĕ. Уйăхне 4 тонна ытла пĕремĕк туса кăлараççĕ ăста алăллă ĕçченсем. Пурĕ 75 тĕрлĕ изделисемпе савăнтараççĕ вĕсем туянакансене. Çулсеренех республикăра Чăвашпотребсоюз ирттерекен конкурссене те активлă хутшăнаççĕ. Сăмахран кăçал çак обществăн «ылтăн алăллă» ăстасем хатĕрлекен паха апат-çимĕç круасан пĕрремĕш вырăн йышăннă, Диплома тивĕçнĕ. Ĕмĕт-тĕллевĕсем пысăк вĕсен. Малашне те çĕнĕрен те çĕнĕ продукци туса халăха туллин тивĕçтерес тесе тăрăшаççĕ.