19 августа 2009 г.
Районти уй-хирсенче ĕççи вăхăчĕ хĕрсе пырать, пĕрчĕллĕ тата пăрçа йышши культурăсем кĕлетсенче куллен хушăнсах пыраççĕ. Çу каçипе каннă хура пусăсенче каллех техника шавĕ кĕрлеме тытăнчĕ. Пирĕн «Арабоси» агрофирма та ку енĕпе аптрасах каймасть. Аслă Чак уйрăмĕнче кĕрхи тулă акма тытăнтăмăр. Кăçал ăна 1500 гектар çинче акса хăварасшăн. Паянхи куна 400 гектар ытла акрăмăр та ĕнтĕ. Акара пур агротехникăлла требованисене те туллин пăхăнса ĕçлетпĕр: малтан çĕре кăткăс удобренисемпе апатлантаратпăр, унтан сÿрелетпĕр, кайран тин акатпăр. В.Семенов тĕп агроном тăтăшах интересленсе тăрать, яваплă çынсенчен тивĕçлипе ыйтать. Кунта çĕр ĕçне чунтан парăннă çынсем ĕçлеççĕ. В.Григорьев çĕре удобрени варăнтарса пырать, А.Ивановпа Н.Васильев механизаторсем техникăсене пĕр тикĕссĕн ĕçлеттереççĕ. П.Семенов, П.Степанов, Г.Моисеев трактористсемпе А.Иванов сеяльщик ывăнма пĕлмесĕр ĕçлеççĕ, тыр-пула вăхăтра акса хăварассишĕн çине тăраççĕ. А.Порфирьев, В.Степанов, В.Иванов водительсем вăрлăхлăх тырра пĕр вĕçĕмсĕр уя турттарса тăраççĕ. Ĕç çирĕп технологипе пырать. Кунти поварсем вĕсене ĕçлекен вырăна вĕри апат тухса çитереççĕ.