15 августа 2009 г.
Кашни çыннăн тирпейлĕ те таса вырăнта пурăнас килет. Çавăнпа та пирĕнтен чылайăшĕ хальхи вăхăтра пахчара ÿсекен çум курăкран, хăрнă туратсенчен, ытти ăпăр-тапăртан хăтăлма тăрăшать. Хăшĕ-пĕри вĕсене урама тухса пăрахма та ÿркенмест, теприсем вара çÿп-çап контейнерĕсене тултараççĕ. Çÿп-çап контейнерĕ çум курăк валли мар. Унта апат-çимĕç, йăлара усă курнă каяшсене кăна пăрахма юрать. Çум курăка, хăрнă туратсене, юрăхсăра тухнă телевизорсене, сивĕтекен оборудованисене тата ытти пысăк калăпăшлă япаласене тасамарлăха тухса тăкакан вырăна турттарса кайма «Коммунальник» муниципаллă унитарлă предприятинчен ятарласа транспорт çыртарса илмелле. Çак пулăшушăн уйрăммăн тÿлеме тивет, мĕншĕн тесен вăл йăлара усă курнă каяшсен шутне кĕмест.
Коммуналлă пулăшупа туллин усă кураççĕ, анчах хăшĕ-пĕри паянхи кунччен те укçа-тенкĕ тÿлеме шутламасть. Пурăнмалли çурт-йĕрĕн пĕр тăваткал метршĕн тухса тăкакан каяш 80 пуспа танлашать. Укçи-тенки пысăках та мар темелле, вăхăтра тÿлесе пырсан парăм та пулмасть. Анчах та кăçалхи августăн 1-мĕшĕ тĕлне коммуналлă пулăшупа усă куракан граждансен парăм 672 пин тенке çитнĕ. Поселокра пурăнакан хăш-пĕр граждансем çак пулăшупа усă кураççĕ, анчах тÿлемеççĕ. Акă поселокри К.Иванов ячĕллĕ урамри виççĕмĕш çуртăн 11-мĕш хваттерте пурăнакан А.Федоровсен çемйи коммуналлă пулăшушăн 7300 тенкĕ тÿлемен. Çавăн пекех Заводская урамри 42-мĕш çуртăн 32-мĕш хваттерĕнче пурăнакан П.Николаевасем - 5159, çак урамри 35-мĕш çуртри 9-мĕш хваттерти Е.Красновасем - 4205, Чувашская урамри 4-мĕш çуртăн 1-мĕш хваттерти И.Алексеевсем 5076 тенкĕ «Коммунальник» муниципаллă унитарлă предприяти умĕнче парăмра. Хальхи вăхăтра коммуналлă пулăшушăн тÿлемен 70 гражданин пирки Вăрмар район судне ĕç тăратнă. Малашне кун пек йывăрлăха кĕрсе ÿкес мар тесен парăмсене татма тăрăшмалла. Тирпей-илеме тытса тăма укçа-тенкĕ сахал мар кирлĕ, çавăнпа та коммуналлă пулăшушăн вăхăтра тÿлеме ыйтатпăр.