15 августа 2009 г.
Районти хуçалăхсенче халĕ çитĕнтернĕ тыр-пула кĕске вăхăтра тата пĕр тăкаксăр пухса кĕртессишĕн мĕн пур вăй-хала параççĕ пулсан, «Чăвашвторчермет» акционерсен уçă обществи вара хуçалăхсенчен тата уйрăм çынсенчен тимĕр-тăмăр пухас енĕпе тăрăшать.
- Кăçалхи февраль уйăхĕнчен пуçласа июль уйăхĕччен пурĕ 737 тонна тимĕр-тăмăр йышăнтăмăр. Июль уйăхĕнче кăна 147 тонна илсе килчĕç, Шупашкара вара 228 тонна тиесе ăсатрăмăр. Çак чĕртавара Сĕве хулинчен, Куславкка, Тăвай районĕсенчен, хамăр районти Шăхаль, Арапуç, Кивĕ Вăрмар тата ытти ялсенчен ытларах килсе параççĕ, - тет Алена Вячеславовна Сергеева весовщица. Алена иртнĕ çул Шупашкарта Чăваш патшалăх университечĕн экономика факультетне вĕренсе пĕтернĕ. Дипломлă çамрăк специалист хăйĕн ĕçне тĕплĕн тума тăрăшать.
Эпир пынă кунхине унта Кĕтеснерти И.Иванов тата Комсомольски районĕнчен В.Юманов автомашинăсемпе тимĕр-тăмăр тиесе килчĕç. Пысăк мар коллективри Н.Филиппов крановщик, тимĕр-тăмăра газпа касса тирпейлекен А.Сидоров, В.Таратин, В.Егоров хăйсен ĕçне тÿрĕ кăмăлпа, яваплăха туйса вăй хураççĕ.
Ку коллектива нумай çул Вячеслав Николаевич Сергеев ертсе пырать. Ăна халĕ вăхăтлăха «Чăвашвторчермет» УАОн Çĕмĕрлери участокне ертсе пыма шаннă.
Вăрмарти участокра халĕ начальник пулса унăн ывăлĕ - Сергей тăрăшать. Шанса панă ĕçе тÿрĕ кăмăлпа пурнăçлассишĕн хăйĕн мĕн пур тăрăшулăхне парать.