15 августа 2009 г.
Кĕлкешри «Ямуков Г.Н.» хресчен (фермер) хуçалăхăн кăçал тĕш тырăпа пăрçа йышши культурăсене пурĕ 1067 гектар çинчен пухса кĕртмелле. Августăн 11-мĕшĕ тĕлне 347 гектарне пухса кĕртнĕ, çав шутран кĕр тыррисем 97 гектар. Хальлĕхе тухăç кашни гектартан 24,8 центнерпа танлашать. Иртнĕ çул вара кашни гектартан тухăç 30,3 центнер пулнă. Хуçалăхра тĕш тырă пухса кĕртмелли комбайнсем - 3. Пурте юсавлă вĕсем. «Хир карапĕсен» штурвалĕсене С.Николаев, Н.Николаевпа Ю.Краснов, Н.Ивановпа В.Ямуков комбайнерсем çирĕп тытса пыраççĕ. Акă, эпир пынă чухне вĕсем пурте пĕрремĕш уйра урпа выраççĕ. Н.Николаев комбайнерăн бункерĕ çĕнĕ тырăпа тулчĕ, çийĕнчех В.Авдеев водитель çитсе чарăнчĕ те, сап-сарă тырра автомашина кузовĕ çине тултарма тытăнчĕ. Çав вăхăтрах кунта Г.Ямуков пуçлăх çитсе чарăнчĕ. Вăл механизаторсем валли кăнтăрлахи апат илсе килнĕ мĕн. Кăштах апатланнă хыççăн çĕр ĕçченĕсем ĕçе пуçăнчĕç, «хир карапĕсем» малалла тапранса та кайрĕç. Çапла вара çурхи культурăсене 970 гектартан 250-шне çапса илнĕ, тухăç гектар пуçне 26 центнер. Çĕр улми лаптăкĕ 130 гектар йышăнать.
- Ир çитĕнекеннине 12 гектар çинчен кăларса илтĕмĕр. «Иккĕмĕш çăкăра» пĕлтĕр кашни гектартан 280 центнер туса илнĕччĕ, кăçал та начар мар. Ыттине кăларма тăхтатпăр-ха, кăштах ÿстĕр, - пĕлтерет фермер хуçалăхĕн пуçлăхĕ Г.Ямуков.
Иртнĕ çул çĕр улмирен самаях пысăк тупăш илнĕ. Çавăнпа унăн лаптăкне ÿстерсех пыраççĕ. Пĕлтĕр ăна 80 гектар çинче çитĕнтернĕ пулсан, кăçал 130 гектар лартнă.
Вĕсем çавăн пекех 70 гектар çинчи нумай çул ÿсекен курăксене пĕрремĕш хутне çулса илнĕ, халĕ иккĕмĕшне пуçланă.
Çитес çулхи тухăçшăн та хĕрÿ кĕрешĕве тухнă Кĕлкешсем. Кĕр тыррисене кăçал 400 гектартан кая мар акса хăварма палăртнă.
Акма çĕр хатĕрленĕ çĕрте халĕ Ю.Николаев çамрăк тăрăшулăх кăтартать. Вăл кăçал кăна-ха Кĕлкешри вăтам шкултан вĕренсе тухнă, Шупашкарти машинăпа технологи техникумне вĕренме кĕнĕ.