Публикации » Çулталăкри чи лайăх почтальон

12 августа 2009 г.

«Раççей почти» федераллă патшалăх унитарлă предприятин филиалĕн Чăваш Республикинчи федераллă почта çыхăнăвĕн управленийĕ ирттернĕ «Çулталăкри чи лайăх почтальон» конкурсра пирĕн районти Кавалти çыхăну уйрăмĕнче почтальонра вăй хуракан Надежда Апполоновна Алексеева пĕрремĕш вырăна тивĕçнĕ. Пултаруллă та маттур почтальон Кавалти çыхăну уйрăмĕнче 8 çул тăрăшса вăй хурать. Вăл ĕçтешĕсем, ял-йыш умĕнче пысăк хисепре. Кашни киле хаçат-журналпа вăхăтра тивĕçтерсе тăрать. Унсăр пуçне çырăнтару кампанинче те чи активлă почтальонсенчен пĕри темелле. Пуринпе те яланах ырă кăмăллă, сăпайлă Н.Алексеева. Çапла пулма ăна юратнă амăшĕ, чылай çул почтальонра тăрăшса вăй хунă пулнă Нина Николаевна Табакова вĕрентнĕ. Мĕн çамрăклах Надежда амăшĕпе пĕрле килĕрен-киле хаçат-журналсемпе тивĕçтерсе çÿренĕ. Сăмах май çакна та палăртса хăвармалла: Н.Алексееван аппăшĕ те Светлана Веселовская почтальон пулса тăрăшнă. Вĕсен почтăра вăй хунă ĕç стажĕ пĕтĕмĕшле илсен 54 çул. Ку почтальонсен династийĕ. Надежда Апполоновнан кĕçĕн хĕрĕ шкул çулне çитмен пулин те, хăйĕн пулас профессине халех палăртса хунă темелле. Вăл та амăшĕпе пĕрлех хаçат-журнал валеçме çÿрет. Эппин Н.Алексеева почтальонсен династийĕ малалла аталанасса шанас килет. Халĕ Надежда Апполоновна «Çулталăкри чи лайăх почтальон» ятпа Мускавра иртекен конкурса хутшăнма хатĕрленет. Апла пулсан ăна малти ретре пулма ăнăçу сунар.