08 августа 2009 г.
Кăçал Республика кунĕнче район центрĕнчи стадионта ăмăрту вăхăтĕнче Кавалта çуралса ÿснĕ Алексей Иванович Туртушова (Николаева) республикăри «Кĕрешÿ» тулли мар яваплă обществăн Президенчĕ Т.Петров ячĕпе «Кĕрешÿ ăсти» ятне илни çинчен свидетельствăна ирĕклĕ майпа кĕрешес енĕпе Раççей спорт мастерĕ В.Чумычкин пачĕ. Çак ята пирĕн ентеш чăннипех те тивĕçлĕ. Спорта юратакансем лайăх пĕлеççĕ ĕнтĕ: ялсенче ирттерекен Акатуйсенче кĕрешсе вăл яланах призлă вырăнсене çĕнсе илетчĕ.
- Кĕрешÿри ăсталăха ÿстерме пулăшнăшăн эпĕ малтанхи тренера - Иван Петрович Таратина тата тăванăма - Юрий Васильевич Покровские тав тăватăп. Вĕсем çине тăнипе ĕнтĕ спортăн анлă çулĕ çине тухрăм, - тет Алексей Иванович.
Вăл Чăваш педагогика институчĕн физкультура факультетне вĕренсе пĕтернĕ. 25 çул Шупашкарти Мускав районĕнчи 50-мĕш шкулта физкультура учителĕнче ĕçлет. Иртнĕ вĕренÿ çулĕнче вăл Раççей Президенчĕн грантне - 100 пин тенкĕне тивĕçнĕ.
Ÿсекен çамрăк ăрăва наци кĕрешĕвĕн мелĕсене вĕрентессишĕн хăйĕн мĕн пур тăрăшулăхне парать. Кашни çулах хăйĕн воспитанникĕсене Космонавтика кунĕнче А.Г.Николаев космонавта асăнса Атăлçи федераци округĕнче ирĕклĕ майпа кĕрешсе мала тухассишĕн Çĕнĕ Шупашкарта ирттерекен турнира хутшăнтарать, вĕсен çитĕнĕвĕсемпе савăнать. Хăй те вĕренекенсемшĕн ырă тĕслĕх пулса тăрать. Кăçал ирĕклĕ майпа кĕрешсе ветерансем хушшинче мала тухассишĕн Çĕнĕ Шупашкарта ирттернĕ ăмăртура 100 килограмм ытларах таякан ветерансем хушшинче пĕрремĕш вырăн йышăннă.