Публикации » Тренер хăйĕн воспитанникĕсемпе

08 августа 2009 г.

Ачасемпе çамрăксен Вăрмарти А.Ф.Федоров ячĕллĕ спорт шкулĕн тренер-преподавателĕ, «Чăваш Республикин тава тивĕçлĕ тренерĕ» хисеплĕ ята тивĕçнĕ В.Сидоров хăйĕн воспитанникĕсен çитĕнĕвĕсемпе чăннипех те савăнать. Çак кунсенче ун патĕнче халĕ Мускавра вĕренекен Никита Чубуков пулчĕ. 2006 çулта вăл кунти спорт шкулĕнче вĕренме пуçланă. Республикăра мала тухассишĕн ирттернĕ тупăшусенче пĕрре кăна мар призерсен шутĕнче пулнă. Унăн пултарулăхне тата малашлăхĕ пысăккине шута илсе пĕлтĕр ăна Мускаври Олимп резервĕсен иккĕмĕш номерлĕ шкулне вĕренме янă. Кăçал вăл спорт мастерĕн кандидачĕн нормине пурнăçланă. Июль уйăхĕнче А.Трофимова асăнса маунтинбайк енĕпе Мăнçырмара ирттернĕ Пĕтĕм Раççейри ăмăртура виççĕмĕш пулнă. Маутинбайк енĕпе Ижевскра ирттернĕ Раççей чемпионатĕнче иккĕмĕш вырăна тухнă. Пенза хулинче 1993-1995 çулсенче çуралнă шкул ачисен IV Раççей Спартакиадинче Мускав хулин пĕрлештернĕ командин составĕнче пулса 4х6 эстафетăра пĕрремĕш вырăн йышăннă. Çак Спартакиадăрах Атăлçи федераци округĕн пĕрлештернĕ командинче пирĕн тепĕр ентеш - Руслан Боредский (Пинер) тупăшнă. «Кросс-кантри» программăра виççĕмĕш вырăна тухнă.