08 августа 2009 г.
ЧР Президенчĕ Н.Федоров: «Çĕр чăмăрне Турă тунă, ыттине йăлтах строительсем».
(2009 çулхи июлĕн пĕрремĕшĕнче Мускавра, Раççей Федерацийĕн Президенчĕ çумĕнчи приоритетлă наци проекчĕсене пурнăçлас тата демографи политики енĕпе ĕçлекен Канаш ларăвĕнче каланă сăмахран).
«Социаллă пурнăç тата экономика аталанăвĕн тĕп çул-йĕрĕсенчен пĕри çурт-йĕр строительстви шутланать», - тесе палăртнă Чăваш Республикин Президенчĕ Н.В.Федоров Чăваш Республикин Патшалăх Канашне янă Çырăвĕнче.
- Çакна асра тытса ĕçлетпĕр те ĕнтĕ эпир, - тет «Урмарская» коллективлă строительство организацийĕ» акционерсен хупă обществин генеральнăй директорĕ Николай Владимирович Зайцев. - Строитель кунĕ кăçал тепĕр паллă датăпа асра юлать. Строительство организацине йĕркеленĕренпе шăп та лăп 50 çул çитрĕ. Кăштах историе асăнас пулсан, хăй вăхăтĕнче районсем хушшинчи строительство организацийĕсем республикипе 16 шутланса тăнă, халĕ вара вĕсем пилĕк районта кăна ĕçлеççĕ, çав шутран пĕри пирĕн районта. Эпĕ вара строительство организацийĕн 13-мĕш начальникĕ.
Пултаруллă коллектива Н.Зайцев 15 çул ăнăçлă ертсе пырать.
- Кăçал пирĕн районта Республика кунне ирттернĕ май, строительство ĕçĕсен калăпăшĕ уйрăмах пысăк пулчĕ, - калаçăва малалла тăсать Николай Владимирович - Праçник тĕлне Вăрмарти историпе тавра пĕлÿ халăх музейне туса пĕтерсе хута ятăмăр. Халĕ вăл поселока илем кÿрет. Нумай хваттерлĕ 22 çурта юсанă. Унсăр пуçне райпо кантурне шал енчен, «Колос» лавккана, «Шоркистринский» производство кооперативĕн администраци çуртне юсаса илемлетнĕ. Кĕçех 24 хваттерлĕ пурăнмалли çурта туса пĕтеретпĕр. Арапуçĕнчи туберкулеза хирĕç кĕрешекен диспансерта юсав ĕçĕсем малалла пыраççĕ. 73 çынран тăракан коллектив кăçалхи çур çулта пурĕ 14 миллион та 566 пин тенкĕлĕх строительствăпа монтаж ĕçĕсем пурнăçланă. Çапла вара çынсене хăтлă çурт-йĕр туса парасси - пирĕн тивĕç.
Хастар коллектива Республика кунне хатĕрленсе ирттерме активлă хутшăннăшăн ЧР Министрсен Кабинечĕн председателĕ - Республика кунне хатĕрленсе ирттерме йĕркеленĕ комитет председателĕ С.Гапликов тав тунă.
Обществăн пурлăхпа техника бази самаях çирĕп. 4 кран, КамАЗ автомашинăсем прицепсемпе 5 тата 2 экскаватор, ытти техника пур.
Ĕç ăнăçлăхне кадрсем татса параççĕ. Шанса панă ĕçе нумай çул тÿрĕ кăмăлпа пурнăçлакансем сахал мар коллективра. В.Николаев водитель 30 çул ĕнтĕ КамАЗ автомашинăна тухăçлă ĕçлеттерет . Ĕçре ырă тĕслĕх кăтартнăшăн ăна «Чăваш Республикин транспортăн тава тивĕçлĕ ĕçченĕ» хисеплĕ ят панă. 9 çын хура тăпраллă мар зонăри «Агропромснаб» кооперацин «Хисеплĕ строителĕ» ята тивĕçнĕ.
Ю. Петрова бухгалтер, С.Иванова штукатур-маляр, тĕрлĕ ĕç тăвакан В.Усков кунта 30-шар çула яхăн вăй хураççĕ. Ю.Васильев прораб ертсе пынипе М.Данилова, В.Васильева, Л.Петрова, А.Федорова, Л.Никифорова, А.Андреева тата ытти штукатур-малярсем халĕ 24 хваттерлĕ çурта тунă çĕрте тăрăшулăх кăтартаççĕ.
Ĕçне кура тÿлевĕ те. Кăçалхи ултă уйăхра рабочисен уйăхри вăтам ĕç укçи 10 пин тенкĕ ытла пулнă.
Строитель кунĕ ячĕпе Чăваш Республикин Хула строительствипе обществăлла инфратытăм аталанăвĕн министерстви кран машинистне Н.Григорьева, А.Иванов водителе, М.Иванова штукатур-маляра Хисеп грамотипе наградăласа чыс тунă.
Пултаруллă организатор ертсе пынипе коллектив малашлăха çирĕп пăхать. Çак кунсенче вĕсем конкурсра 20 миллион тенкĕлĕх ĕç тума тендер выляса илнĕ. Август уйăхĕнче Вăрмар строителĕсем Сергач хулине тухса каяççĕ. Кунта вĕсен нумай хваттерлĕ 4 çурта юсаса памалла. Вĕсене ăнăçу сунатпăр.