22 июля 2009 г.
Энĕшпуç ял тăрăхĕн администраци çурчĕ аякранах илемлĕн курăнса ларать. Шала кĕрсен типтерлĕх хуçаланать. Пысăк та çутă пÿлĕмсенче кашни япали хăй вырăнĕнче. Ял тăрăхĕн пуçлăхĕ Олег Анатольевич Иванов кабинетĕнче вара пархатарлă ĕçшĕн панă Хисеп грамотисемпе дипломсем куç умне тухса тăраççĕ. Чуна парса ĕçленипе çĕнсе илнĕ вĕсене. 2009 çул умĕн район администрацийĕ Çĕнĕ çула, хулапа ял тăрăхĕнчи урамсене, картишсене, предприятисемпе организаци, учреждени территорийĕсене çутăпа кĕтсе илес тĕлĕшпе районта «Çутă пултăр» конкурс ирттерчĕ. Конкурсра çĕнтерсе ял тăрăхĕ I степеньлĕ диплома çĕнсе илчĕ.
Чăваш Республикин патшалăх влаçĕн тата вырăнти хăй тытăмлăх органĕсем Пĕтĕм Раççейри «Раççей йĕлтĕр йĕрĕ – 2009» чупу ирттернĕ, унта хутшăнса Энĕшпуç ял тăрăхĕ «Чи лайăх спорт аталаннă ял тăрăхĕ» номинацире пĕрремĕш вырăн йышăннă.
Гражданла оборона ĕçне çĕнетсе лайăхлатас, чрезвычайлă лару-тăрăва сирсе ярас енĕпе ирттернĕ конкурсра ял тăрăхĕсем хушшинче Энĕшпуçсем мала тухнă. Район пуçлăхĕн В.Кирилловăн грамотине илме тивĕç пулнă. Экономика кăтартăвĕсемпе те ял тăрăхĕсенчен чи лайăххи шутланать.
Вырăнти хăй тытăмлăх органĕсен тивĕçĕсенчен пĕри – хăйсен территорийĕсенче пушара хирĕç тĕрлĕ мероприяти ирттересси. Кăçал Республика кунĕнче Энĕшпуç ял тăрăхĕн муниципаллă пушар хуралăн çуртне уçрĕç. Ку – районшăн, уйрăмах Пысăк Енккасси, Пинер, Энтрияль ял тăрăхĕсемшĕн, кÿршĕллĕ Тăвай районĕнчи Элпуç, Нÿшкасси, Çĕнçырма, Ураскасси ялĕсенчи çынсемшĕн пĕлтерĕшлĕ. Пушар хуралĕнче тăрăшакансем шăпах çак территорие пăхса тăрĕç.
Ял тăрăхĕнче вăй хуракансем, яваплă ытти должноç йышăнакансем пушар таврашĕ ан тухтăр тесе тĕрлĕ мера йышăнни аван. Çапах та уйрăм çынсен те асăрханулăхпа тимлĕх пирки манас марччĕ. Пушар вăл вăрă-хурах çеç мар. Çаратма килнĕ çын хăйпе пĕрле темиçе япала çеç илсе кайма пултарать. Вут-çулăм вара пĕтĕм пурлăха кĕле, кăмрăка çавăрать.
Пушар хуралĕн çуртне уçнă çĕре республикăри Гражданла оборонăпа чрезвычайлă лару-тăру енĕпе ĕçлекен патшалăх комитечĕн председателĕ В.Петьков, «Пĕтĕм Раççейри ирĕклĕ пушар обществи» обществăлла организацин председателĕ С.Сергеева хутшăннă.
Сумлă хăнасем пушă алăпа килмен: «ЗИЛ-130» пушар машини, шыв уçлакан насус парнеленĕ. Халĕ вара пушар деповĕнче икĕ автомашина: малтан пулнă ГАЗ-53 тата халĕ парнелени. Районти ВДПО çĕнĕ пушар хуралĕн çурчĕ уçăлнă ятпа тум-тир, атă-пушмак, сĕтел-пукан парнеленĕ. Сигнализаци лартса панă. Çав автомашинăпа хальлĕхе Н.Алексеев ĕçлет. Малтан вăл Вăрмарти пушар чаçĕнче ĕçлерĕ. Энĕшпуçĕнче пушар хуралĕ уçăлсан унта куçрĕ.
– Хальлĕхе пушар пулмарĕ-ха, Турă сыхлатăрах,– тет Николай Павлович водитель.
Ял тăрăхĕн пуçлăхĕ О.Иванов ялта пушар хуралĕн çуртне туса лартнишĕн питех те кăмăллă. Вăл ял тăрăхĕн администрацийĕн çурчĕпе юнашарах вырнаçнă.
– Республика кунĕнче пушар хуралĕн çуртне хута янă чухне республика пуçлăхĕсем пире тепĕр пушарник штачĕ туса пама шантарчĕç. Пирĕн ыйтăва пурнăçласан, ĕç-пуç татах та лайăхланмалла, пушар хăрушсăрлăхĕ енĕпе те пысăк пулăшу пулĕ, – тет Олег Анатольевич Иванов.