22 июля 2009 г.
Шупашкарти «Мега Молл» суту-илÿ комплексĕн лапамĕнче иртнĕ Пĕтĕм Раççейри «Чăвашри сăра тинĕсĕ» тăххăрмĕш фестивале тĕп хуларан çеç мар, ялсенчен те чылайăн килнĕ. Ăна савăнăçлă лару-тăрура ЧР Министрсен Кабинечĕн Председателĕн çумĕ - ял хуçалăх министрĕ М.Игнатьев уçнă. Вăл сăра туса кăларакансен хушшинче конкуренци чăнласах пысăккине, тупăшлă аталанас тесен уявсенче ырă ят-сума тивĕçмеллине палăртнă. 2009 çул - Çĕр ĕçченĕн çулталăкĕ. Çавна май ял çыннин хастарлăхĕ, тăрăшулăхĕ тата та ытларах палăрать. Асăннă фестивале Вăрмар райповĕн «Нива» тулли мар яваплă обществи те хутшăннă. Çак фестивальте «Грушевый аромат» пылак шыв ылтăн, «Тархун» кĕмĕл медальсене çĕнсе илнĕ. Палăртма кăмăллă: «Чăвашри сăра тинĕсĕ» фестивале райпон «Нива» тулли мар яваплă обществи 5 çул хутшăнать. Кашнинчех кунта туса кăларакан «Грушевый аромат» пылак шыв ылтăн медале тивĕçнĕ. Ку вара унăн сумĕ, хисепĕ татах та пысăкрах пулнине уççăн палăртать.
«Пахалăх палли - предприяти ăнăçлăхĕ. Эпир туса кăларакан продукци экологи тĕлĕшĕнчен таса та сывлăхшăн усăллă. «Грушевый аромат» тата ытти пылак шывсене эпир сахăр сиропĕнчен кăна туса хатĕрлетпĕр. Хамăр маркăна çирĕп тытса пыратпăр. Çавна май пирĕн продукци складра пухăнса выртмасть, ăна предпринимательсем, уйрăм çынсем хăвăрт туянса пĕтереççĕ. Çуллахи шăрăх çанталăксенче вара халăха паха продукципе тивĕçтерес тĕллевпе ĕçе икĕ сменăпа йĕркелерĕмĕр», - тет обществăн пуçлăхĕ В.Дудкин кунти ĕç-хĕлпе тĕплĕн паллаштарнă май.
Кăçалхи çур çулхи ĕç кăтартăвĕсем те курăмлă. Çак вăхăт тĕлне пурĕ 39,8 пин декалитр пылак шыв, кисель -16, кăлпасси - 3,8 тонна, çурма фабрикатсем 586 пин тенкĕлĕх туса кăларнă. Общество ÿсĕмĕ - тăрăшуллă кадрсенче. Кунта тăрăшса вăй хуракан В.Михайлова мастер, А.Семенова оператор, Л.Александрова чăн-чăн ăста специалистсем. Вĕсем тăрăшнипе ĕç хăвăртлăхĕ, пахалăхĕ ÿссех пырать.
Пĕтĕмĕшле каласан райпон «Нива» тулли мар яваплă обществи çулран-çул аталанса пырать, район халăхне, тулашра пурăнакансене паха продукципе тивĕçтерме тăрăшать.