18 июля 2009 г.
Ватăсем мĕн астăвассах июлĕн 9-мĕшĕнче, Тихвински таса Турă Амăшĕн кунĕнче, Мăнçырмасем ял уявне уявлаççĕ. Малтанах ирхине чиркÿре кĕлĕ иртрĕ. Ун хыççăн халăх тата сумлă хăнасем çырмана сиплĕ çăл патне анчĕç. Вĕсем витресем, тĕрлĕ савăт-сапа илсе пычĕç. Мăнçырма чиркĕвĕн настоятелĕ Леонид атте çăл патĕнче кĕлĕ ирттерчĕ, шыва çветит турĕ. Тĕрлĕ ялсенчен пухăннă халăх çак сиплĕ шыва савăтсене тултарчĕ. Леонид атте Турă ячĕпе ырлăхлă-сывлăхлă пулма пехил пачĕ.
Каярах ял халăхĕ, хăнасем савăнсах шкул стадионне ушкăн-ушкăнпа пуçтарăнма тытăнчĕç. Йĕри-тавра лавккасем вырнаçнă, унта темĕн те илме пулать: апат-çимĕç, тăхăнмалли япаласем, ача-пăча теттисем.
Вунпĕр сехетре ялти культура çурчĕ çумĕнчи пултарулăх коллективĕн концертчĕ пуçланчĕ.
Унтан савăнăçлă уява Мăнçырма ял тăрăхĕн пуçлăхĕ В.Семенов уçрĕ. Ял халăхне, хăнасене саламласа ырлăх-сывлăх, ăнăçу сунчĕ. Геннадий Мефодьевич Мефодьева 85 çул тултарнă ятпа парне парса чысларĕ. А.Архиповапа М.Матвеевана тата ыттисене хушма хуçалăхра выльăх-чĕрлĕх ĕрчетнĕ çĕрте вăй хурса ĕçленĕшĕн, пахча çимĕç туса илес енĕпе тăрăшнăшăн Хисеп грамоти тата парне парса чысларĕç.
Унтан район пуçлăхĕн заместителĕ, райадминистрацин ял хуçалăхĕпе экологи тата çĕрпе пурлăх пайĕн начальникĕ Л.Петров сăмах илчĕ. Вăл Вăрмар район пуçлăхĕнчен В.Кирилловран саламлă çыру вуласа пачĕ.
«Павлов Вячеслав Федорович» хресчен (фермер) хуçалăхне ертсе пыраканĕ В.Павлов ял хуçалăх ĕçĕнче тăрăшса вăй хуракансене сумлă парнесем парса чысларĕ. Хăмла ĕрчетнĕ çĕрте тăрăшулăх кăтартнăшăн «Ресурсы» акционерсен уçă обществин генеральнăй директорĕ С.Дмитриев парнесем пачĕ. З.Владимирова агронома, лайăх ĕçлесе плана тултарса пынăшăн, Хисеп грамоти парса чысларĕç.
Вăрмарсен Шупашкарти ентешлĕхĕн вице-президенчĕ В.Нягин сăмах илчĕ. Вăл ял халăхне, хăнасене саламларĕ, ырă кун-çул сунчĕ, Г.Мефодьева Хисеп грамоти парса уйрăм чыс турĕ.
Ялти культура çурчĕ çумĕнчи пултарулăх коллективĕ концерта малалла тăсрĕ. Вăл вара кăнтăрла иртсе пĕр сехетчен пычĕ. Унтан савăнăçлă концерта Шупашкартан килнĕ чăваш эстрада çăлтăрĕсем пуçларĕç. Çав хушăрах стадион территорийĕнче тĕрлĕрен вăйăсем ирттерме тытăнчĕç.
Кире пуканĕ çĕклесе пĕрремĕш вырăна Тутар Республикинчи Маматăш ялĕнче çуралса ÿснĕ Сайфуллин йышăнчĕ, иккĕмĕш вырăна Мăнçырмари А.Белов, виççĕмĕшне вара Кивĕ Вĕренер хăни А.Каланов тухрĕç.
100 метра чупассипе пĕрремĕш вырăна А.Назаров, иккĕмĕш вырăна Л.Савельев тухса малтисен ретне йышăнчĕç. Армреслинг енĕпе ăмăртса арçынсем хушшинче пĕрремĕш-иккĕмĕш вырăнсене ял маттурĕсем Р.Алиевпа Р.Цыркунов илчĕç, виççĕмĕш вырăна вара аякран килнĕ хăна М.Михайлов илчĕ.
Турник çинче туртăнассипе пĕрремĕш вырăна Вăрмар хăни А.Хованский, иккĕмĕш вырăна А.Белов тухрĕç.
Волейбол вăййи хĕрÿллĕ иртрĕ. Унта тăватă команда хутшăнчĕ. Пĕрремĕш вырăна Арапуç ял тăрăхĕн команди илчĕ, иккĕмĕш вырăна Мăнçырма, виççĕмĕш вырăна Тикаш,тăваттăмĕшне вара Кĕлкеш ял тăрăхĕсен командисем тухрĕç.
Чи юлашкинчен иртнĕ вăйă вăл – кĕрешÿ. Унта районти тĕрлĕ ялсенчи маттурсем хутшăнчĕç, анчах та хамăрăн Мăнçырма ялĕнче çуралса ÿснĕ паттăра никам та çĕнтереймерĕ. С.Павлов пĕрремĕш вырăн йышăнчĕ, уншăн ăна парне – така – пулчĕ . Иккĕмĕш вырăна С.Павловпа кĕрешнĕ А.Иванов (Вăрмар поселокĕ) йышăнчĕ.
Акатуя ирттерме Ю.Афанасьев, В.Иванов, В.Пидюков, С.Дмитриев, А.Белов, Ю.Данилов тата А.Гурьев спонсăрла пулăшу кÿчĕç. Вĕсене ял халăхĕ ырă сăмах кăна калать.
Чылайччен савăнчĕ халăх уявра. Ватти те, вĕтти те мĕн каç пуличченех юрласа ташларĕ. Çапла пулмасăр, ял уявĕ çулталăкра пĕрре килет, ятарласа çак кун çĕршывăн тĕрлĕ кĕтесĕсене саланнă ентешсем килеççĕ. Çитес çул татах та кун пек чаплă уяв пуласса шансах тăрать ял халăхĕ.