18 июля 2009 г.
Йăлана кĕнĕ йĕркепе кашни çулах райпо ĕçченĕсем хăйсен профессиллĕ уявне паллă тăваççĕ. Хальхинче вĕсем ăна Раççей потребкоопераци - 178, Пĕтĕм тĕнчери потребкоопераци 87 çул тултарнине халалланă. Çавна май Вăрмар райповĕнче тăрăшса вăй хуракансем ку уява пысăк çитĕнÿсемпе кĕтсе илчĕç. Чаплă уява Вăрмар район пуçлăхĕ В.Кириллов, райпо канашĕн председателĕ К.Никитин хутшăнчĕç.
Чи малтанах сăмах райпо канашĕн председателĕ К.Никитин илчĕ. Вăл райпо системинче тăрăшса вăй хуракансене, тивĕçлĕ канăва тухнисене уяв ячĕпе саламларĕ, ăнăçу сунчĕ. Вăл çавăн пекех кăçалхи пĕрремĕш çур çулăн итогĕсемпе те тĕплĕн паллаштарчĕ. Çак вăхăтра тавар çаврăнăшĕн калăпăшĕ 75,3 миллион тенкĕпе танлашнă, 11,7 миллион тенкĕлĕх продукци туса кăларнă. Ял хуçалăх продукцийĕ тата ытти чĕр тавар 4,7 миллион тенкĕлĕх хатĕрленĕ. Обществăлла апатлану предприятин тавар çаврăнăшĕ 13,2 миллион тенкĕпе танлашнă. Çăкăр - 240,8, кондитер изделийĕсем - 28,2, кисель - 16, кăлпасси 3,8 тонна, пылак шыв 39,8 пин декалитр, çурма фабрикатсем 586 пин тенкĕлĕх туса кăларнă. Çаксене пĕтĕмпех ăста алăллă, хăйсен ĕçне пур кăмăлтан пурнăçлакан райпо çыннисем тăваççĕ.
«Потребкоопераци вăйĕ - пĕрлĕхре. Йывăр вăхăтсенче те потребкоопераци ĕçченĕсем алă усса ларман, май пур таран райпо системине аталантарассишĕн тăрăшнă, халĕ те пысăк тÿпе хываççĕ. Социаллă миссие пурнăçласа потребкоопераци хальхи вăхăтра та çĕнĕ ĕç вырăнĕсем йĕркелессипе, ял хуçалăх продукчĕсене туянассипе тĕллевлĕ ĕçлет. Паянхи кун та аякри ялсене кирлĕ таварсемпе тивĕçтересси, нумай ачалллă çемьесене, инвалидсене, ватă çынсене пулăшасси ырă йăлана кĕнĕ. Малашне те хастар ĕçлесе пыма ырлăх-сывлăх сунатăп», - терĕ Константин Владимирович хăйĕн калаçăвне вĕçленĕ май. Вăрмар район пуçлăхĕ В.Кириллов сăмах каларĕ. Вăл район аталанăвĕнче райпо пысăк вырăн йышăннине, производство хăвачĕ ÿссе пынине, районта пурăнакансем валли çĕнĕ ĕç вырăнĕсем йĕркеленине палăртрĕ. Малашне те пĕрле тачă çыхăнура ĕçлемеллине каларĕ. Районăн социаллă-экономикăллă аталанăвĕнче пысăк тÿпе хывнăшăн райпо системине райадминистрацин Хисеп грамотипе наградăларĕ.
Унтан райпо ĕçĕнче палăрнă пултаруллă ĕçченсене чысларĕç. Райпо системинче чылай çул тăрăшса вăй хуракан, хăйсен ĕçне тÿрĕ кăмăлпа пурнăçлакан Э.Борисова бухгалтерпа райпо правленийĕн председателĕн заместителĕ Н.Семенова «Раççей Федерацийĕн потребкооперацин ветеранĕ» хисеплĕ ята тивĕçнĕ. «Раççей потребкооперацинче тÿрĕ кăмăлпа ĕçленĕшĕн» знака Е.Андреева, Е.Павлова, Л.Сиделкина, «Раççей потребкооперацинче 30, 25, 20 çул тÿрĕ кăмăлпа ĕçленĕшĕн» знаксене Г.Андреева, З.Григорьева, Г.Федорова, И.Федотова, Л.Родзянова лавкка заведующийĕсем илме тивĕç пулчĕç. «Раççей коопераци юхăмĕн çамрăк лидерĕ» ята Т.Григорьева, Л.Петрова лавкка заведующийĕсем илчĕç. РФ Центросоюзĕн Хисеп грамотине Л.Кузьминана пачĕç.
«Чăваш Республикин потребительсен кооперацийĕн ветеранĕ» сумлă ята Р.Белоусова сутуçă, Н.Григорьева çăкăр пĕçерекен, В.Михайлова мастер, А.Михайлова техник-технолог, Е.Николаева буфетчица тивĕçрĕç.
Чăвашпотребсоюзăн Хисеп грамотипе Р.Павлова кондитера, Л.Саминов электрика, А.Голосов водителе, О.Демидова лавкка заведующине, Г.Иванова повара, И.Михайлова кондитера, Тав çырăвĕпе Е.Григорьева лавкка заведующине наградăларĕç. Унсăр пуçне Вăрмар район пуçлăхĕ В.Кириллов райпора чылай çул тăрăшса вăй хуракан, обществăлла ĕçсене активлă хутшăнакан 22 ĕçчене район администрацийĕн Хисеп грамотине чаплă лару-тăрура пачĕ. Çавăн пекех райпон профсоюз комитечĕпе канашĕн Хисеп грамотине 27 çын, Тав çырăвне 8 çын тивĕçрĕ.