15 июля 2009 г.
2010 çулта пирĕн республикăра вырăнти хăй тытăмлăх органĕсен суйлавĕ иртмелле. Çавна май халĕ çак пысăк пĕлтерĕшлĕ мероприятие хатĕрленес тапхăр пырать. Ку енĕпе уйрăмах çамрăксене пысăк тимлĕх уйăрмалла. Ахальтен мар ĕнтĕ Канаш районĕнчи Шăхасанти ачасен сывлăхне çирĕплетмелли «Космонавт» лагерьте «Суйлав вăл кирлĕ» темăпа çамрăксен проекчĕн зонăри фестивалĕн тапхăрĕ иртрĕ. Унта вунă районтан çамрăксен командисем хутшăнчĕç. Кашниех хăйсен районĕн чысне пултаруллă хÿтĕлерĕç. 2009 çул Раççей çамрăкĕсен çулталăкĕ пулнă май, çамрăк суйлавçăсемпе ĕçлесси мĕнле шайра пулнине кăтартса пачĕ. Команда членĕсен суйлав историне, суйлавçăсен прависене пĕлмелле пулчĕ, художествăлла пултарулăх тата культура çÿллĕ шайра пулнине çирĕплетсе памалла.
Хăйĕн содержанийĕпе конкурс программи савăнăçлисемпе тавçăруллисен клубĕ (КВН) евĕр иртрĕ. Командăсене заданисем пачĕç, вĕсене пурнăçлама малтан хатĕрленме лекрĕ. «Киле панă ĕç – команда визитки» конкурсра пирĕн район чысне Кивĕ Вăрмарти çамрăксен командинчи Е.Ксенофонтова, Н.Аршинова, О.Павлова (руководителĕ С.Антонов) хÿтĕлерĕç. Команда «Эпир – пулас суйлавçăсем» темăпа тупăшрĕ, 7,25 балл пухрĕ. Чăваш Республикин тĕп суйлав комиссийĕн председателĕн заместителĕ А.Цветкова пирĕн командăна ырласа çапла каларĕ: «Вăрмар районĕнчи чи çамрăк командăна лайăх енĕпе уйрăмах палăртас килет».
Командăсен капитанĕсем хушшинче суйлав историйĕпе, суйлавçăсен правипе тата процесĕпе ирттернĕ конкурсра 10 балл пухса пирĕн район администрацийĕнчи Л.Степанов пĕрремĕш вырăн йышăнчĕ.
Кашни районăн стена хаçачĕ кăлармаллаччĕ. Унта районта суйлав мĕнле иртнине, суйлава çамрăксем епле хутшăннине, çамрăксен обществăлла-политикăлла мероприятийĕсене тата çамрăксен организацийĕсен ĕçне-хĕлне, вĕсен çитĕнĕвĕсене кăтартма тиврĕ. Хаçатсен содержанине, унăн илемлĕхне хакларĕç. Арапуçĕнчи пĕтĕмĕшле пĕлÿ паракан тĕп шкулта кăларнă çамрăксен хаçачĕ 5,5 балл пухса виççĕмĕш вырăн йышăнчĕ.
«Суйлава – юрăпа» музыка конкурсĕнче район чысне райадминистрацин вĕрентÿпе çамрăксен политикин пайĕнчи çамрăксемпе ĕçлекен К.Яковлев специалист хÿтĕлерĕ, 6,25 балл пухрĕ. Вăл баянпа вылянине тата Раççей çинчен хывнă юрра юрланине ЧР тĕп суйлав комиссийĕн председателĕ Л.Линик пысăка хурса хакларĕ.
Фестиваль итогĕсемпе пирĕн районăн çамрăксен команди асăнмалăх диплома тата хаклă парнене тивĕçрĕ.