15 июля 2009 г.
Чăваш милицине 89, республикăри пушар хуралĕн Управленине йĕркеленĕренпе 77 çул çитнине халалласа кăçал апрелĕн 15-мĕшĕнчен пуçласа июнĕн 1-мĕшĕччен районти ачасем хушшинче виççĕмĕш хут «Саккунпа йĕрке хуралĕнче» конкурс иртрĕ.
Ăна «Вăрмарсен Шупашкарти ентешлĕхĕ» обществăлла организаци канашĕ, Раççей Черезвычайлă лару-тăру министерствин ЧР тĕп управленийĕ, Республикăри шалти ĕçсен тата шалти çарсен ветеранĕсен (пенсионерсен) обществăлла организацийĕ, «Хĕрлĕ ялав» хаçат редакцийĕ йĕркеленĕ. Конкурсра тăратнă ĕçсене жюри членĕсем «Статьясем, очерксем, калавсем, хайлавсем, тĕпчев ĕçĕсем», «Ÿкерчĕксемпе ÿнерлĕх ĕçĕсем», «Ушкăнпа хатĕрленĕ ĕçсем» номинацисенче хакларĕç, 1 – 3 вырăн йышăннă 13 çĕнтерÿçĕне палăртрĕç.
Ÿссе çитĕнекен ăрăва патриотизмла воспитани парас тĕлĕшпе витĕм кÿрекен, йĕрке, пушар хуралĕн ĕçченĕсен профессине пропагандăлама пулăшакан çак мероприятие Вăрмарти Г.Е.Егоров ячĕллĕ пĕрремĕш вăтам, Пысăк Енккасси, Энтрияль, Чулкас, Кĕлкеш, Кивĕ Вăрмар, Кĕтеснер, Мăнçырма шкулĕсенче вĕренекенсем уйрăмах активлă хутшăнчĕç, çавăнпа та Хисеп грамотисемпе укçан парнесене те вĕсемех тивĕçрĕç. Конкурс ачасен нумай енлĕ пултарулăхне уçса пама пулăшрĕ. Акă Пысăк Енккасси шкулĕнчи 3-мĕш класра вĕренекен Ю.Иванова пушар кăларса тăракан хăрушлăха калăпăшĕпе пысăках мар, анчах шухăшĕпе капашлă «Пысăк инкек» сăвăра витĕмлĕн уçса пама пултарнă. Кĕлкеш шкулĕнче вĕренекенсем вара вут-çулăм кÿрекен инкеке ÿкерчĕксем урлă сăнланă. Кĕтеснер шкулĕ çумĕнчи «Взгляд» пресс-центр хатĕрленĕ «Тимлĕ пулăр» информаци бюллетенĕ те самаях шухăша ярать, çавăнпа та ăна тивĕçлĕ хак памасăр хăвармарĕç. Конкурсра çĕнтернисем кăна мар, активлă хутшăннă хăш-пĕр ачасем те хавхалантару призĕсене тивĕçрĕç. Çĕнтерÿçĕсене районти шалти ĕçсен пайĕ умĕнче хăйсен тивĕçĕсене пурнăçланă чухне пуçĕсене хунă милици сотрудникĕсене асăнса лартнă обелиск умĕнче конкурс комиссийĕн председателĕ, район пуçлăхĕн заместителĕ, вĕрентÿпе çамрăксен политикин пайĕн пуçлăхĕ Ю.Соколов, «Вăрмарсен Шупашкарти ентешлĕхĕ» обществăлла организацин хисеплĕ вице-президенчĕ Д.Егоров, вице-президенчĕ В.Нягин, Республикăри шалти ĕçсен ветеранĕсен ячĕпе М.Киселев генерал-майор, РФ Муниципаллă академин доценчĕ В.Иванов, районти пушар чаçĕн начальникĕ В.Ефремов, ШĔПĕн обществăлла хăрушсăрлăх милицин начальникĕ А.Яранов чысларĕç.
«Романтика» лагерьте канакансем те хăйсен тантăшĕсене саламлама çитнĕ – пысăках мар концертпа савăнтарчĕç. Çак конкурсра юлашки кунсенче хутшăннăран, вĕсем те хавхалантару призĕсемлĕ пулчĕç. Ахальтен мар конкурс комиссийĕн председателĕ Ю.Соколов кăçалхи конкурса районти кăна мар, республика шайĕнчи те теме пулать терĕ. (Ара, лагерьте тĕрлĕ район ачисем те канаççĕ-çке).
«Вут-çулăм пĕчĕк хĕлхемрен тухать», – теççĕ халăхра. Ку хутĕнче çак каларăш ырă пĕлтерĕшĕпе сарăлтăр – районта çуралнăскер республика шайне çиттĕр.