04 июля 2009 г.
Патăрьел районĕнчи «Труд» производство кооперативĕнче ял хуçалăх техникин «Уй–хир кунĕ – 2009» куравне тата сухаçăсен ăмăртăвне пирĕн районти «Шигали» хуçалăхран Александр Владимирович Ульянов МТЗ–82 тракторпа ПЛН-4,30 плуг кăкарса хутшăннă.
Пухăннисем çĕнĕ йышши энерги тата ресурс перекетлекен технологипе паллашрĕç, малта пыракан хăватлă техника мĕнле ĕçленине пăхса хакларĕç. Унта Чăваш Енри «Чувашагролизинг», «Чувашагрокомплект», «Агротехкомплект», «Белпроссервис», «Агротрейдинг» пĕрлешÿсем, инновациллĕ технологие пурнăçа кĕртсе пыракан, çĕнĕ йышши техникăпа усă куракан хуçалăхсем хутшăнчĕç.
Куравра ял хуçалăхĕнче усă курмалли, çĕр пахалăхне лайăхлатмалли, тĕш тырă, пахча çимĕç туса илмелли, çĕр хатĕрлемелли, акмалли, минерал удобренийĕ сапмалли, ÿсен–тăрана хÿтĕлемелли тĕрлĕ техникăсемпе паллашма май килчĕ. Унта пирĕн районти «Арабоси» агрофирма» тулли мар яваплă обществăн генеральнăй директорĕ Г.Тимофеев, «Шигали» хуçалăх пуçлăхĕ А.Ульянов, хресчен (фермер) хуçалăх ертÿçисем Г.Ямуков, В.Иванов, А.Сапаркин, В.Павлов тата ыттисем те хутшăнчĕç. Курмалли, пĕлмелли, вĕренмелли, хамăр ĕçре усă курмалли куравра нумай пулчĕ.