01 июля 2009 г.
Тăван çĕрпе пĕлсе кăна усă курмалла мар, ăна упрамалла тата хÿтĕлемелле. Çĕрпе мĕнле усă курасси çĕр ĕçченĕсенчен килет, упрама вара çĕр çинче пурăнаканăн пурин те тăрăшмалла, хÿтĕлесси - чăн-чăн арçынсен тивĕçĕ.
Çул çитнĕ çамрăксем салтака кайма ят тухсан хăйсен тивĕçĕсене сумлă пурнăçлаççĕ. Хăшĕ-пĕрисем çар ĕçне килĕштерсе хăйсем салтакра пулнă вырăнтах контракт майĕпе юлаççĕ, теприсене тăван кĕтес ытларах хăй патне туртать. Тăван вырăнтан хакли çук пулин те (кризис вăхăчĕ хăйĕн ĕçне пурнăçлать) хăш-пĕр чухне салтакран таврăнсан çамрăксем ĕç вырăнĕ тупайманнипе аптраса çÿреççĕ. Ĕç вырăнĕ пулмасан укçа-тенкĕ енчен те хĕсĕкрех килсе тухать, апла пулсан çемье çавăрассине те каярах хăварма тивет. Кун пек йывăрлăхсем килсе ан тухчăр тесен мĕн тума пулать-ха; Чи малтанах Вăрмар тата Куславкка районĕсенчи çар ĕç комиссариатне килсе пулăшу ыйтма пултаратăр. Кунтан контракт майĕпе тĕрлĕ çар чаçĕсене службăна кайма пулать. Тĕслĕхрен, Оренбург облаçĕнчи Тоцкое поселокĕнчи 21- мĕш мотострелоксен бригади, Самара облаçĕнчи Кряж поселокĕнчи 23-мĕш, çавăн пекех Рощински поселокĕнчи 15-мĕш мотострелоксен бригадисем, Свердловск облаçĕнчи Екатеринбург хулинчи 28-мĕш мотострелоксен бригади, Челябинск облаçĕнчи Чебаркуль хулинчи 7-мĕш танк бригади, Пермь крайĕнчи Звездный поселокĕнчи 385-мĕш артиллери бригади тата Пушкăртри Алкино поселокĕнчи 56-мĕш саперпа инженери полкĕ салтакра пулнă, судпа айăпланман 35 çула çитмен, сывлăх енчен çирĕп çамрăксене кĕтеççĕ. Вĕсен уйăхри вăтам ĕç укçи 15 пинрен пуçласа тата пысăкрах пулать. Пурăнмалли вырăнпа, тумтирпе тивĕçтереççĕ. Тÿлевсĕр медицина пулăшăвĕ параççĕ. Отпуск вăхăчĕ 30 талăк тата ытларах. 20 çул службăра пулнă хыççăн пенсие тухма ирĕк пур. Çапла вара çамрăксем çар ĕç вырăнĕпе туллин усă курма пултаратăр. Тĕплĕнрех пĕлес тесен Вăрмар тата Куславкка районĕсенчи çар ĕç комиссариатне кĕрсе тухма е 2-11-09, 2-12-95, 2-13-64 номерлĕ телефонсемпе шăнкăравлама пултаратăр.