27 июня 2009 г.
Районта юрта лашасен чупăвĕ пуласси пирки хаçатра çырса пĕлтернĕччĕ ĕнтĕ. Акă çакă самант çитрĕ. Районта халиччен пулман спорт ăмăртăвĕ тĕлĕнмелле хаваслă, интереслĕ иртрĕ. Лашасене курсан тÿрех «Урхамахсем тăраç тăпăртатса, çилхи вĕçĕсене вĕçтерсе...» текен юрра шăрантарса юрлас килчĕ. Автозаправка умĕнче ятарласа хатĕрленĕ ипподрома юрта лашасемпе пĕрле республикăри «Лаша спорчĕн ача-пăча шкулĕ» ГУДО воспитанницисем тата Шупашкар районĕнчи «Отрадное» лаша спорчĕн клубне çÿрекенсем хутшăнчĕç.
Чи малтанах республикăри юрта лаша спортне юратакансем Чăваш Республикин Президенчĕн Н.Федоровăн призĕпе кубокĕшĕн ăмăртăва тухрĕç. Унта 2008 çулта Чăваш Республикинчи ипподромсенче хăйсен лашисемпе мала тухнă 5 утçă хутшăнчĕç. Дистанци 2400 метр пулчĕ. Çивĕч ăмăртура 3 минут та 20,4 çеккунтра Ласковый май лашапа Н.Пыркин чи малтан финиша çитсе пĕрремĕш вырăна тухрĕ. Чăваш Республикин Патшалăх Канашĕн призĕсемшĕн 1600 метра чупса И.Матвеев Размин лашапа çĕнтерчĕ. Унăн икĕ гит чупнă результачĕ 4 минут та 23,8 çеккунт пулчĕ.
Уçă Чемпионатра та ăмăрту çивĕч иртрĕ. Дистанци 1600 метр. Ку ăмăртура чемпион ятне Д.Степанов Сфинкс лашапа çĕнсе илчĕ. Ку лашан хуçи П.Агафонов. Сфинкс 2 минут та 7,9 çеккунтра финиша çитрĕ.
Юрта лашасен чупăвĕсем хушшинчи кĕске тăхтавсенче те пушă пулмарĕ ипподром. Малтанах уçланкăна туй кĕписем тăхăннă пикесем тухрĕç. Французсенчен тухнă хăйне евĕрлĕ ташă вăйă-катильон кăтартса пачĕç. Çак илеме кăтартаканĕсем республикăри «Лаша спорчĕн ача-пăча шкулĕ» ГУДО воспитанницисем пулчĕç. Вĕсен ăсталăхĕ куç умĕнче пулчĕ. Лашасем вĕттĕн-вĕттĕн утса вырăнтан-вырăна куçрĕç, пĕр вырăнта çаврăнчĕç. Темле хусканусем те турĕç, акăшсем шывра ишнĕ пекех туйăнчĕ.
«Отрадное» лаша спорчĕн клубне çÿрекенсем те халăха тыткăна илчĕç. Чупса пыракан лаша çинче тĕрлĕ йывăр та кăткăс упражненисене вĕсем çăмăллăнах пурнăçларĕç. Хăйсем вĕсем çакна «джигитовка» теççĕ. Лашана хăвăрт чуптарнă вăхăтра куç хупса лаша çинчен сиксе анса хăвăрт каялла утланса лараççĕ, вăрăм шалчапа та тĕрлĕрен упражненисем пулчĕç, тĕрлĕрен чăрмавсене çĕнтерсе вирхĕнчĕç урхамахсем, çулăм урлă та пĕр хăрамасăр сикрĕç, çĕрте выртакан казаксен калпакне те вирлĕн чупса пыракан лаша çинчен пĕшкĕнсе илчĕç. Мĕнле кăна тĕлĕнтермерĕç пуль джигитсем пуçтарăннă халăха. «Отрадное» клуба çамрăксене те явăçтараççĕ. Чи çамрăкки - В.Сергеев - 13 çулта. Джигитсем хушшинче 17 çулхи хĕр ача та пур. Аня Романова арçын ачасемпе пĕр тан тĕрлĕрен хусканусем, упражненисем тума пултарни пурне те тĕлĕнтерчĕ. Мĕн ăмăрту вĕçленичченех «Маттур» тесе кăшкăрни таврана саланчĕ. Районта пĕрремĕш хут иртнĕ лаша спорчĕн ăмăртăвне халăх йышлă хутшăнни те çак ăмăрту пурне те кăмăла кайнине палăртрĕ.