27 июня 2009 г.
кĕтсе илчĕç район çыннисем Республика кунне. Çапла пулмасăр, кун пек пысăк уяв пирĕн тăрăхра пуçласа пулчĕ. Хыçра мĕн чухлĕ ырри, мĕн чухлĕ лайăххи, унпа пĕрлех ырми-канми ĕçлени. Тăрăшни сая каймарĕ. Район центрĕ, ял тăрăхĕсем капăрланса илемленчĕç. Çуртсене юсаса çĕнетрĕç. Чăваш Республикин культура вăй-хăватне малалла аталантарма условисем туса парас тĕллевпе 2007 çултах палăртнă ЧР Президенчĕн Указĕ вăя кĕрсе пыни куç умĕнче. Клубсене çĕнетсе юсама тытăнчĕç. Нумаях пулмасть пирĕн районти Арапуç ялĕнчи клуб - культурăпа кану центрĕ пулса тăнине хаçатра çырса пĕлтернĕччĕ. Акă, халĕ Вăрмар поселокĕнчи культурăпа кану центрне тĕпрен юсаса çĕнетрĕç те савăнăçлă лару-тăрура уçрĕç. Çакă июнĕн 23-мĕшĕнче пулчĕ. Ăна уçма район пуçлăхĕн заместителĕ Ю.Соколов, райадминистрацин культурăпа социаллă аталану пайĕн начальникĕ Г.Петрова, Вăрмар хула тăрăхĕн администрацийĕн пуçлăхĕ В.Иванов тата ытти яваплă çынсем хутшăнчĕç.
«Культура яланах пирĕнпе, мĕн çуралса ватăлса виличченех. Модернизациленĕ культура çурчĕсем вара халăхăн культурине татах та ÿстермелле, ÿстереççĕ те. Республика кунĕ умĕн çакă район халăхĕшĕн чăннипех те пысăк парне пулчĕ. Клуб учрежденийĕн паянхи тĕнче йышăннă çĕнĕ моделĕсене туса хунинче райадминистрацин тÿпи питех те пысăк. Малашне çитес ăрусем валли мĕн пуррине тирпейлĕ упрасси хамăртан килет», - терĕ Юрий Васильевич. Унпа пĕрлех ЧР Культура министерстви ячĕпе çĕнĕ технологисен пур йышши оборудованин тата сценăна илемлетмелли костюмсен свидетельствине Вăрмарти хула-ял тăрăхĕсем хушшинчи культурăпа кану центрĕн директорне Т.Викторована пачĕ. Çавăн пекех ăна культура çуртне модернизацилес тĕлĕшпе нумай вăй хунăшăн ЧР Культура, национальноçсен ĕçĕсен, информаци политикин тата архив ĕçĕн министерствин Хисеп грамотипе наградăларĕç.
Савăнăçлă мероприятие «Парне» тата ытти художествăлла пултарулăх ушкăнĕсем хăйсен юрри ташшисемпе илем кÿчĕç. Фойере ал-ĕç кружокĕнчи ачасен ăсталăхне, хамăр ентеш Пысăк Енккасси шкулĕнче вĕреннĕ З.Душкован кĕнекисемпе картинисене курма май килчĕ.