20 июня 2009 г.
ЧР Хула строительстви тата обществăлла инфратытăм аталанăвĕн министерстви граждансене ишĕлекен çуртсенчен куçармалли Программăна пурнăçа кĕртес тĕлĕшпе патшалăх заказĕсене вырнаçтарас енĕпе ирттернĕ конкурсра «Урмарская» коллективлă строительство организацийĕ» хупă акционерлă общество çĕнтернĕ. Вăрмар поселокĕнче 8,5 миллион тенкĕлĕх 10 хваттер туянма контракт тунă.
- Хальхи вăхăтра эпир Вăрмар поселокĕнчи Порфирьев урамĕнче 24 хваттерлĕ çурт тăватпăр. Октябрĕн 1-мĕшĕ тĕлне ăна хута яма палăртнă. Конкурсра выляса илнĕ укçана малтанах пĕтĕмпе памаççĕ. Малтанлăха 2,5 миллион тенкине илтĕмĕр, ыттине туса пĕтерсен çеç параççĕ, - тет обществăн генеральнăй директорĕ Н.Зайцев. - Хваттерсен хуçисем е ишĕлекен хваттерсенче пурăнакансем, çурта купалама пая кĕнĕ çемьесем пулĕç.
90 çынран тăракан коллективăн ĕç калăпăшĕ пĕчĕк мар. Республика кунĕ тĕлне Вăрмар поселокĕнчи 22 çурта юсаса йĕркене кĕртмелле. Район музейне савăнăçлă лару-тăрура уçмалла. Арапуçĕнчи туберкулез диспансерĕн çуртне юсамалла.
24 хваттерлĕ çурта купаланă çĕрте строительсен ĕçне Ю.Васильев прораб йĕркелесе пырать. Раствор хатĕрленĕ çĕрте С.Мельников тăрăшулăх кăтартать. С.Иванов крановщик ĕç вăхăчĕпе туллин усă курма тăрăшать. Г.Смирнов, А.Груздьев, В.Романов, Д.Иванов каменщиксем те пуçаруллă. А.Казанов, А.Усков рабочисем те хастар. Çуртăн иккĕмĕш хутне купаласа пĕтернĕ, плитасемпе витсе хунă. Кантăкĕсене лартма пуçланă. Ăшă кĕртме хатĕрленеççĕ. Халĕ виççĕмĕш хутне купалаççĕ. Кунта 9 çын вăй хурать. Пурте Тăвай районĕнчен вĕсем, килĕшÿпе ĕçлеççĕ.
- Çуртăн виççĕмĕш хутне июлĕн 15-мĕшĕ тĕлне купаласа пĕтермелле, - пĕлтерме васкать В.Миронов бригадир.
Тăрăшса вăй хураççĕ строительсем. Уява ĕçри çитĕнÿсемпе кĕтсе илме хатĕрленеççĕ.