20 июня 2009 г.
Районта иртекен Республика кунĕнче тĕрлĕрен ăмăртусем пулса иртĕç, çав шутра юрта лашасен чупăвĕ те. Ку спорт мероприятийĕ пирĕн районта пĕрремĕш! хут пулать.
Федерацин ЧР лаша спорчĕн председателĕ В.Максимов пĕлтернĕ тăрăх ăмăрту виçĕ ушкăнпа иртет. Пĕрремĕшĕ - Чăваш Республикин Н.Федоровăн призĕпе Кубокĕшĕн пулать. Унта 2008 çулта Чăваш Республикинчи ипподромсенче мала тухнă 5 утçă хутшăнать. Вĕсем: В.Краснов, Н.Пыркин (иккĕшĕ те Шупашкартан), А.Каргин (Патăрьелтен), И.Матвеев (Шăмăршăран), Д.Степанов (Канаш районĕнчен). Дистанци - 2400 метр. (Пирĕн районти ипподромра çакă виçĕ çаврăм пулать). Сăмах май каласан, спорта юратакан утçăсем чылай çулсем ĕнтĕ хăйсен килĕсенче юрта лашасем тытаççĕ.
Иккĕмĕш ушкăн Чăваш Республикин Патшалăх Канашĕн призĕсемшĕн пулать. Дистанци - 1600 метр. Кунта мала тухассишĕн икĕ хут чупма тивет (гит). Чи лайăх пилĕк результат кăтартнисем финала тухаççĕ. Уçă чемпионата - ăмăртăва кам килнĕ пурте пĕр тан хутшăнаççĕ.
Виççĕмĕшне - Чăваш Республикинчи чи вăйлă чемпион ятшăн чупĕç. Уçă чемпионатра чуптарнин юлашки тапхăрĕ пулĕ. Ăмăртусем автозаправка çывăхĕнчи ипподромра 14-00 сехетре пуçланаççĕ. Вăл виçĕ сехет хушши тăсăлĕ.
Эпир пĕлнĕ тăрăх ку ăмăртăва республикăри тата юнашар республикăсенчи чи вăйлă спортсменсемпе лашасем хутшăнмалла. Сăмахран «Матис», «Махалин», «Розмен», «Прием», «Ласковый май» тата хамăр район çыннин Н.Ванеркинăн «Влада» ятлă кĕсри тата ыттисем те хутшăнĕç.