20 июня 2009 г.
Июнĕн 18-мĕшĕнче ЧР Президенчĕ Н.Федоров 2 сехете пынă интерактивлă хутшăну вăхăтĕнче республикăра пурăнакансен, журналистсен чи çивĕч ыйтăвĕсене хуравларĕ. «Тÿрĕ калаçăва» 12 сехетрен пуçласа «ВолгаТелеком» АУОн кабель сетĕнче тата Интернет сетĕнче Чăваш Республикин влаç органĕсен порталĕнче кăтартрĕç. Шупашкар, Çĕнĕ Шупашкар хулисенче, Вăрмар районĕнче пурăнакансемпе тÿрĕ çыхăну йĕркелерĕç.
12 сехет тĕлне Вăрмар поселокĕнчи тĕп площаде халăх чылай пухăнчĕ. Унтах район депутачĕсен Пухăвĕн депутачĕсем, ял тăрăхĕсен пуçлăхĕсем тата ыттисем. «Тÿрĕ калаçу» пуçланчĕ. Николай Васильевич Президент 15 минут хушшинче республикăн социаллă-экономикăллă аталанăвĕ, умра тăракан тĕллевсем çинчен тĕплĕн каласа пачĕ.
Унтан журналистсен, Шупашкарта тата Çĕнĕ Шупашкарта пурăнакансен ыйтăвĕсем çине тĕплĕн те ăнланмалла хуравларĕ.
Черет пирĕн районта пурăнакансем патне çитрĕ. Чи малтанах Тикаш ялĕнче пурăнакан В.Нарсов çапла ыйту пачĕ:
- Пире, ялта выльăх-чĕрлĕх усракансене, юлашки вăхăтра ĕне сĕчĕн сутлăх хакĕ пĕрмаях чакса пыни пăшăрхантарать. Паянхи кун ялта сĕте 1 литрне 4 тенкĕ те 50 пуспа сутатпăр пулсан, дизель топливине 17 тенкĕпе туянатпăр. Малашне те çаплах пулсан - ялсенче ĕнесен шучĕ самаях чакма пултарать. Ял çыннине пулăшас тĕллевпе мĕнле улшăнусем тума палăртнă;
Николай Васильевич ку ыйтупа правительство шайĕнче ĕçлеме пуçлани, кирлĕ мерăсем йышăнма палăртни çинчен пĕлтерчĕ.
Чупайĕнчи Е.Вавилована вара ял урамĕсене хытă сийлĕ çулпа çыхăнтарасси канăç памасть.
- Республикăри ялсене асфальт сарнă çулпа çыхăнтармалли Программăна пурнăçларăмăр. Халĕ вара урамсене сармалла. Ун валли эпир укçа-тенкĕ кашни çулах нумай уйăратпăр. Çавăнпа та çак ĕçе пурнăçлама проектпа смета документацийĕ тума васкăр, - терĕ Президент.
Район депутачĕсен Пухăвĕн депутачĕ В.Николаев культурăна аталантарас енĕпе нумай ĕçсем туса ирттернине палăртрĕ. Ку енĕпе малашлăхсем еплерех-ши; - ыйтать вăл.
- Халиччен пурнăçланă ĕçсемпе эпĕ хам та кăмăллă. Физкультурăпа спорт комплексĕсем, модельлĕ библиотекăсем тата пĕтĕмĕшле практика врачĕсен офисĕсем уçни пуриншĕн те савăнăç. Пирĕн тата клуб учрежденийĕсене модернизацилемелле, халăхшăн тата ытти усăллă ĕçсем тумалла, - терĕ Николай Васильевич.
«Тÿрĕ лини» тухăçлă иртнипе Н.Федоров Президент кăмăллă пулчĕ, унта хутшăннисем те ыйтусем çине тулли хуравсем илме пултарчĕç.