17 июня 2009 г.
Календарь тăрăх пăхас пулсассăн, Эколог кунне кашни çулах июнĕн 5-мĕшĕнче паллă тăваççĕ. Анчах тăван тавралăха юратакансемшĕн çăва тухсан кашни кунах хăйне евĕр экологи кунĕ пулса тăрать. Урлă выртакан каскана тăрăх çавăрса хурсан та мĕн те пулса çавах илемленет.
Кивĕ Вăрмарти Г.Петров, В.Васильев, В.Никифоров вара каскана мар, хăйсем пурăнакан çывăхри çăла «çавăрса» (лайăх пĕлтерĕшпе ĕнтĕ) хунă.
Хурлăхан çырми теççĕ ăна ялта пурăнакансем. Маларах кĕпе-йĕм çума та, шыв ăсма та çÿретчĕç çынсем. Уйкас урамне шыв кĕртнĕ хыççăн çырмари сукмака такăрлатакансем те сахалланчĕç, хĕвеле хирĕç тухакан çăл шывĕ сиплĕ тенĕрен хăяр-помидор тăварлама кăна ăсма тытăнчĕç. Пăхса тăмасан вара çăл кăна мар, кил-çурт та юхăнать. Çуллахи типĕ çанталăкра урамри колонкăсенче шыв пĕтсен çăл шывне питĕ кайса ăсасчĕ те - анчах унăн тавра шурлăхланса кайнă. Çак йĕркесĕрлĕхе пĕтерме шутланă та ĕнтĕ виçĕ кÿршĕ. «Урмарская» кайăк-кĕшĕк фабрики (виççĕшĕ те унта вăй хураççĕ) хăма-йывăç парса пулăшнă. Ытти вара - хăйсен ал ăсталăхĕ.
- Чи малтанах çăла тасатрăмăр, - каласа парать Геннадий Михайлович Петров, - унăн çулĕ йÿпленнипе шыв тĕрлĕ çĕртен сăрхăнма пуçланăччĕ, çавна пула таврара шурлăхлансах кайнăччĕ. Унтан умне хăма майласа сартăмăр...
Таканисене те йĕркене кĕртнĕ, шыв ĕçме савăчĕ те пур. Илемленсе, капăрлансах кайнă халĕ çăл вырăнĕ. Пĕчĕк уявсем ирттерме сĕтел-пукан вырнаçтарма та шухăш пур-ха ÿркенмен ăстасен. Сăмах май, çăлсене тирпей-илем кĕртесси çине ял тăрăхĕн администрацийĕ те пысăк тимлĕх уйăрать. Çĕнкас, Туçи çăлĕсене çветит туса часавайсем те лартнă.