06 июня 2009 г.
Пĕтĕм тĕнчери ачасене хÿтĕлемелли куна халалласа Вăрмар поселокĕнчи тĕп площадьре савăнăçлă уяв иртрĕ. Пухăннисене чи малтанах район пуçлăхĕн заместителĕ - вĕрентÿпе çамрăксен политикин пайĕн начальникĕ Ю.Соколов саламларĕ.
- Ачасем пирĕн пурнăçра чи хакли. Эпир вĕсене пĕтĕм ыррине пама тăрăшатпăр. Вĕсем пире шанăç кÿреççĕ. Пирĕн ачасене кăмăл-сипет тĕлĕшĕнчен пуян чун-чĕреллĕ, ырăшăн тăрăшакан, тăван çĕршыва юратакан пулса ÿстерме пур вăя памалла, - терĕ Юрий Васильевич.
Савăнăçлă уява райадминистрацин вĕрентÿпе çамрăксен политикин пайĕн ертсе пыракан специалисчĕ К.Яковлев ертсе пычĕ. Тĕп площадь ачасен савăнăçлă сассипе тулчĕ: пĕрисем сцена çинче хăйсен пултарулăхне кăтартрĕç, теприсем куç хупса тетте касса илмелле выляççĕ, виççĕмĕшĕсем асфальтлă çул çинче ÿкерчĕксем ÿкерес конкурса хутшăнчĕç тата ытти те. Юлашкинчен конкурссен пĕтĕмлетĕвĕ пулчĕ. Ачасем пĕри те кучченеçсĕр юлмарĕç.
Кавал. В.Осипов музыкант марш кĕвви каланипе садикрен ачасем стройпа урама тухрĕç. Вĕсем Пĕтĕм тĕнчери ачасене хÿтĕлемелли уява ирттерме тухнă мĕн. Часах ачасен ушкăнĕ Кавалти стадионта чарăнчĕ. Кунта вĕсене Кавал халăхĕ, ачасен ашшĕ-амăшĕсем кĕтсе тăраççĕ иккен. Уява ача сачĕн заведующийĕ Т.Григорьева уçрĕ, унтан концерт пуçланчĕ. Ăна Н.Семенова воспитатель ертсе пычĕ. Нумай юрăсем юрларĕç, ташларĕç пĕчĕк «артистсем», курма килнисене савăнтарчĕç. Юрăсенче, ташăсенче уйрăмах А.Гарифуллина, К.Алексеева, И.Артюков лайăх юрларĕç, ташларĕç. Курма пынисем Кавалти ача садĕнче ĕçлекен воспитательсене çакăн пек лайăх концерт хатĕрлесе лартса кăтартнăшăн чĕререн тав турĕç.