Публикации » Ватăпа - ватăлла, çамрăкпа - çамрăкла

06 июня 2009 г.

Халăха социаллă хÿтлĕхпе тивĕçтерессипе районта 2 центр ĕçлет. Пĕри - ватăсемпе, тепри çул çитмен ачасемпе. Паян сăмах Вăрмар район халăхне социаллă хÿтлĕх паракан центрта вăй хуракан Людмила Александровна Софронова пирки пырĕ. Вăл çак центрта 1992 çултанпа вăй хурать. Медицина училищи вĕренсе тухнăскер часах ватăсемпе пĕр чĕлхе тупать. Пулăшу медицина енчен кăна кирлĕ мар-çке ватăсене, ăшă сăмах пуринчен пахи. Ку вара Людмила Александровнан çителĕклех. Ватăсемпе ĕçлеме тытăниччен вăл Арапуç больницинче аккушеркăра вăй хунă, унтан - центрта. 1995 çулта ваттисен çурчĕ районти социаллă хÿтлĕх паракан уйрăма куçать. Ĕçпе пĕрле - вĕренÿ тенĕ пек Мускаври социаллă патшалăх университечĕн Шупашкарти филиалĕнче вĕренсе хăйĕн пĕлĕвне ÿстерет. Çакă ăна юратнă ĕçĕнче питех те нумай пулăшса пырать. Вăл Арапуçĕнчи ваттисен çурчĕн заведующийĕ. Унпа пĕрле тата 10 çын вăй хураççĕ. Пурте ватăсене канлĕ те хăтлă пурнăç туса парассишĕн тăрăшаççĕ. Вĕсене ырлăх кÿрекенсене уяв ячĕпе саламласа ырлăх-сывлăх сунар.