03 мая 2009 г.
Çирĕм çул каяллах пысăках мар илемлĕ Карăкçырма ялĕ кунтан чаплă спортсменсем тухнипе палăрма пуçларĕ. Çăмăл атлетика енĕпе СССР спорт мастерĕн ятне тивĕçнĕ Зоя Миролюбовăпа Татьяна Тихонова (Титова) кунта çуралса ÿснĕ. Т.Титова (халĕ Америкăра пурăнать) малтан вăрăм дистанцисене чупассипе, унтан хăвăрт утас енĕпе çĕршыв чемпионачĕсенче тата тĕрлĕ патшалăхсенче иртнĕ пысăк ăмăртусенче лайăх кăтартусем турĕ, тĕнче класлă спорт мастерĕ пулса тăчĕ. Вĕсен эстафетине Татьяна Петрова илчĕ те халĕ ăна çÿллĕрен те çÿле çĕклесе пырать.
- Эсир мĕншĕн çăмăл атлетикăна килĕштеретĕр; - тесе ыйтсан вăл çапла хуравларĕ: «1999 çулхи кĕркунне Пысăк Енккассинчи вăтам шкула СССР тава тивĕçлĕ тренерĕ М.П.Кузнецов пынăччĕ. Ахăртнех, район чысне хÿтĕлесе республикăри ăмăртусенче эпĕ мĕнле чупнине асăрханă пулĕ ĕнтĕ. Вăл мана Шупашкарти Олимп резервĕсен училищине вĕренме пыма сĕнчĕ. Манăн малтанхи тренер Ю.Архипов илсе кайса вырнаçтарсах хăварчĕ. Çапла вара эпĕ спортăн анлă çулне такăрлатма пуçларăм».
Çитĕнÿ хыççăн çитĕнÿ тунипе савăнтарать пире Карăкçырма хĕрĕ.
2005 çулта Европа чемпионатĕнче тунă пысăк çитĕнĕве паянхи пекех лайăх астăвать Татьяна. Германири Эрфурт хулинче 23 çула çитмен çăмăл атлетсем хушшинче старта икĕ хут тухса Хисеп пьедесталĕ çине икĕ хут улăхнă. Малтанхи кунĕнче 10 километрлă дистанцие 33.55.00 минутра вĕçлесе Европа чемпионкин ятне тивĕçнĕ. Иккĕмĕш кунĕнче 5000 метра тупăшса иккĕмĕш пулнă – киле ылтăн тата кĕмĕл медальсемпе таврăннă тĕнче класлă спорт мастерĕ.
2006 çулхи августăн 7-13-мĕшĕсенче çăмăл атлетика енĕпе Швецири Гетеборг хулинче иртнĕ Европăн XIX чемпионатĕнче 3000 метрлă дистанцие чăрмавсем урлă чупса иккĕмĕш вырăн йышăннă, кĕмĕл медаль çĕнсе илнĕ.
2008 çул Пекинри XXIX Олимпиадăпа паллă пулчĕ. Хусанти Тĕп стадионта пине яхăн çăмăл атлет тăватă кун Раççей чемпионатĕнче ăмăртнă. Чи вăйлисем медальсемпе парнесемшĕн кăна мар – Пекинри Олимпиадăна хутшăнма путевка çĕнсе илессишĕн те çивĕч кĕрешнĕ. Вĕсен шутĕнче Татьяна Петрова та пулнă.
3000 метра чупассипе Европа, тĕнче чемпионачĕсенче кĕмĕл медаль çĕнсе илнĕ Тĕнче класлă спорт мастерĕ, пирĕн ентеш Хусан стадионĕнче каллех пысăк ăсталăх, чăтăмлăх кăтартнă. Шупашкарти Олимп резервĕсен училищинчен вĕренсе тухнă маттур спортсменка иккĕмĕш вырăн йышăннă, Пекинри Олимпиадăна хутшăнма путевка çĕнсе илнĕ. Старта вăл августăн 17-мĕшĕнче тухнă. 3000 метра чăрмавсем урлă чупса финиша тăваттăмĕш çитнĕ.
- Татьяна, эсир Китайра мĕнле ăмăртнине эпир тимлĕн сăнарăмăр, сирĕншĕн «чирлерĕмĕр». Эсир çĕнтерессе шаннăччĕ, - пĕлтертĕмĕр хамăр шухăша.
- Старт парсанах хытăрах чупса кайрăм пулĕ. Хамăн вăйпа тĕрĕс усă курма пĕлеймерĕм. Финиша çитеспе вара хампа тупăшакансенчен иртме май килмерĕ: вăй-хал пур пек, анчах урасем итлемерĕç, çавăнпа тăваттăмĕш вырăна юлтăм.
Чăваш Республикин физкультурăпа спорт тата туризм министерстви иртнĕ çулхи смотр-конкурса пĕтĕмлетнĕ. Т.Петрова «2008 çулхи чи лайăх спортсмен» ята тивĕçнĕ. ЧР Президенчĕн Хушăвĕпе спортра пысăк çитĕнÿсем тунăшăн вăл кăçал та Президент стипендине илсе тăрать.
Çак кунсенче Таня пире тепĕр чаплă çĕнтерÿпе савăнтарчĕ. АПШри Лос-Анджелесра ирттернĕ марафонра вăл финиша 2:25:59 вăхăтра çитнĕ, пĕрремĕш вырăн йышăннă.