30 мая 2009 г.
Район администрацийĕн вĕрентÿ тата çамрăксен политикин пайĕ хушма пĕлÿ паракан вĕрентекенсемпе ирттернĕ конкурсра Вăрмарти Г.Е.Егоров ячĕллĕ пĕрремĕш вăтам шкулта биологипе хими предмечĕсене вĕрентекен, «Çамрăк медик» кружок ертÿçи Юлия Александровна Давыдова лауреат ятне çĕнсе илнĕ.
Ю.Давыдова 1957 çулта Вăрмар поселокĕнче çуралнăскер, мĕн ачаранах учитель ĕçне юратнă. Ÿссен те вăл çак профессине алла илме шутланă. 1974 çулта вăл И.Я.Яковлев ячĕпе хисепленекен Чăваш патшалăх педагогика институтне вĕренме кĕрет. Биологипе хими факультетĕнче ăс пухать пултаруллă хĕр. 1979 çулта алла диплом илсен тăван ене таврăнать, Вăрмарти пĕрремĕш вăтам шкулта биологипе хими предмечĕсене вĕрентме тытăнать.
30 çула яхăн тăрăшать вăл çак ĕçре. Унăн вĕренекенĕсем кашни çулах районта, республикăра иртекен олимпиадăсенче, наукăпа практика конференцийĕсенче малти вырăнсене çĕнсе илеççĕ. Юлия Александровна районти методика пĕрлешĕвĕ биологи тата экологи предмечĕсен вĕрентекенĕсемпе ирттернĕ «Шкулти хальхи çĕнĕ урок» конкурсăн лауреачĕ те. Ачасене тарăн пĕлÿ панипе пĕрлех хăйĕн профессиллĕ пĕлĕвне ÿстерсех пырать. «Чăваш Республикин вĕрентÿ институчĕ» патшалăх вĕрентÿ учрежденийĕнче «Шкулта биологи предметне наукăпа методика енчен вĕрентесси» темăпа квалификацине ÿстернĕ. «Пуласлăх вĕренĕвĕ» Intel программăпа профессиллĕ хатĕрленÿ тухнă. 2004 çулта вăл пĕрремĕш квалификаци категорине тивĕçет.
«Пĕтĕмпех юратуран пуçланать. Вăл пирĕн кăмăл-туйăма палăртать. Учитель ĕçĕнче те юрату туйăмĕ малти вырăнта пулмалла. Унăн ачасене хăй вĕрентекен предмета юратма, уроксене итлеме, ача тавракурăмне аталантарма, лайăххине начарринчен уйăрма, пулас профессине ачаранах тĕрĕс суйласа илме вĕрентмелле, шкулта иртекен мероприятисене явăçтармалла. Пĕтĕмĕшле каласан ача шкулăн уйрăлми пайĕ пулмалла», - тет Ю.Давыдова вĕрентекен. Çавăнпа та пултаруллă педагог ачасене биологи урокĕнче тăван тавралăха юратма, унăн илемне курма, çав таврара хăйсен вырăнне тупма вĕрентет. Çак пархатарлă ĕçе уроксенче кăна мар, хăй ертсе пыракан «Çамрăк медик» кружокра та малалла тăсать вăл. «Тĕп тĕллев - биологи предметне аталантарасси, ăна наука пек пăхма вĕрентесси, ачасене ырă, сывă пурнăç йĕркине тытса пыма пулăшасси», - тет Юлия Александровна. Палăртма кăмăллă, 2008-2009 вĕренÿ çулĕнче Вăрмарти Г.Е.Егоров ячĕллă пĕрремĕш вăтам шкулта 70 ытла тĕрлĕ кружоксемпе секцисем ĕçленĕ. Ачасене уроксенче тата кружоксенче паха, тарăн пĕлÿ панăран унăн вĕренекенĕсен малашлăхĕ пысăк. Чылайăшĕ шкул вĕренсе пĕтерсен И.Н.Ульянов ячĕллĕ Чăваш патшалăх университечĕн медицина факультетĕнче, Шупашкарти медицина колледжĕнче, Хусанти химипе технологи институтĕнче пĕлÿ пухаççĕ. Юлия Александровна вĕрентсе кăларнă Т.Григорьева Мускаври Сеченов ячĕллĕ медицина академинчен вĕренсе тухнă. Халĕ асăннă академинче Е.Макарова тарăн пĕлÿ пухать. Вĕсем пурте талантлă, анлă тавракурăмлă Ю.Давыдова педагогăн ĕçне мала тăсаканĕсем.
Паян та Юлия Александровна тавра тулли ача-пăча. Вăл вĕрентмелли хăйне евĕрлĕхсене лайăх пĕлет, вĕсене ансат, уçăмлă чĕлхепе ăнлантарса парать.
Çав уроксенче илнĕ пĕлÿ çĕршыв-аннемĕре, тăван ене юратас ĕçре пысăк пĕлтерĕшлĕ. Ю.Давыдова пек хăйĕн пултарулăхĕпе туллин усă куракан учитель ытларах пулни вĕрентÿпе воспитани ĕçне çĕнĕлĕхсем кĕртме, çапла майпа ырă çитĕнÿсем тума май парать.