13 мая 2009 г.
Ача-пăча ăс-тăнне аталантарас ĕçре ача сачĕ мĕнле пысăк вырăн йышăнни каламасăрах паллă ĕнтĕ. Çавăнпа çак енĕпе воспитательсем те, райадминистрацин вĕрентÿпе çамрăксен политикин пайĕн специалисчĕсем те ашшĕ-амăшĕсемпе ĕçлеççĕ. Акă районти çул çитмен ачасен учрежденийĕсенче çулсеренех «Ăслă ача» ăс-тăн вăййи иртет. Кашни ача садĕнче вăйăра çĕнтернисем нумаях пулмасть район центрĕнчи «Колосок» ача садне пухăнчĕç, кунта финал вăййи иртрĕ. Малтанах пурне те вĕрентÿ пайĕн информаципе методика центрĕн методисчĕ Л.Кашмакова саламларĕ, конкурса хутшăнакансене - вĕсем вара 14 пулчĕç - çитĕнÿсем тума ăнăçу сунчĕ.
Тĕрлĕ тĕрĕслев витĕр тухма лекрĕ пĕчĕк интеллектуалсен, хăйсемпе паллаштарнă хыççăн «Математика вăчăри», «Савăнăçлă шутлав», «Тăваткала тултар», «Йĕкĕрешсем», «Асамлă сехет», «Сиктерсе хăварнă цифрăна туп» конкурссем пулчĕç. Ячĕсенченех вăйă ытларах математика еннелле сулăннине куратпăр, çавăнпа та пуçа чылай «ватма» лекрĕ çамрăк участниксен. Пĕтĕм тур витĕр тивĕçлĕ тухса çĕнтерÿçĕ ятне пĕрремĕш номерлĕ «Березка» ача садĕнчи Мария Иванова (Генина) тивĕçрĕ. Çĕнтерÿçĕ те, тĕрлĕ номинацисенче палăрнисем те райадминистрацин вĕрентÿпе çамрăксен политикин пайĕн Дипломĕсемпе парнисене тивĕçрĕç.
Логикăлла шухăшлама пĕлни ачасене шкулта вĕренме кăна мар, пурнăçри тĕрлĕ лару-тăрусенчен те тухма пулăшасса питĕ шанас килет.