13 мая 2009 г.
Ырă ĕç эрнине хутшăнса регионри уçă конкурс Лауреачĕ, хамăр шкулта Н.Иванов патĕнче баянпа темиçе çул каярах вĕренсе тухнă, халĕ Шупашкарти И.Н.Ульянов ячĕллĕ университетăн виççĕмĕш курс студенчĕ Юрий Сергеев пысăк концерт лартса пачĕ. Конкурс валли концерт программине хатĕрлеме ăна Г.Чиркин, А.Белянкин баянистсем сахал мар пулăшнă. Халĕ Юрий университетра Н.Гараев баянист патĕнче вĕренет.
Тĕл пулу-концертра пирĕн ентеш хăйĕн чи пысăк пултарулăхне, профессионаллăхне тепĕр хут кăтартрĕ. Хальхинче вăл И.Бахăн орган валли çырнă «Прелюдипе фугине», В.Золотаревăн 3-мĕш номерлĕ Сонатăн вĕçне, Д.Скарлатин «Ре мажорлă Сонатине», В.Черниковăн вырăс халăхĕн «Эй, ухнем!» юррине илемлетнине, В.Семеновăн «Лăпкă тинĕс» çинчен çырнине, В.Зубецкин Пьяцоле Асторуна халалланă кĕвĕсене чи çепĕç те хăюллăн, ытарайми туйăмпа, илемлĕ те сăнарлăн, профессионаллă, чуна тивмелле баянпа каланине залри халăх чĕререн ăшă туйăмпа тăвăллăн алă çупса, хавхаланса кĕтсе илчĕ.
Юрий Сергеев çак концертрах электронлă баян çинчен каласа, итлекенсене тĕплĕн ăнлантарса уçă урок ирттерчĕ, унпах «Мастер-класс» урок пынă чух тĕрлĕ çемĕсем выляса пурне те тĕлĕнтерчĕ, хăйĕн ăсталăхне, талантне татах та çирĕплетрĕ.
Тĕл пулу-концерт пуриншĕн те асра юлчĕ. Пултаруллă Лауреата Вăрмар енче час-часах тĕрлĕ концертсем лартса панăшăн, мероприятисене хутшăнса ачасемпе аслисен канăвне лайăх йĕркеленĕшĕн райадминистрацин вĕрентÿпе çамрăксен политикин пайĕ тата Вăрмарти музыка обществин правленийĕ Хисеп грамотисем, парнесем парса чыс турĕç. «Концертшăн, паха та ырă ĕç тунăшăн пысăк тав! Татах килĕр! Питĕ кĕтетпĕр!»,- çапла ăсатрĕç хăнана, Юрий Сергеева, залра итлекен – куракансем.