06 мая 2009 г.
Кĕтеснерте çуралса ÿснĕ, унтах тĕпленсе çемье çавăрнă Николай Никонорович Никоноров çак кунсенче 70 çул тултарчĕ. Ĕç ветеранĕн кун-çулĕ сумлă та пархатарлă. Ялти ытти çамрăксем пекех ача чухнех вăл çĕр ĕçне килĕштернĕ. Ялти шкулта 7 класс пĕтернĕ хыççăн пĕр çул колхозра лашапа, унтан 3 çул прицепщикра ĕçленĕ. Çавăн чухне килĕштернĕ те ĕнтĕ вăл техникăна, шофера вĕреннĕ. Ĕçленĕ хушăрах Вăрмарти каçхи вăтам шкула вĕренсе пĕтерсе аттестат илет.
1958 çулта унăн Совет Çарне службăна кайма черет çитет.
Виçĕ çул сисĕнмесĕрех иртсе каять. Салтакран пĕрремĕш класлă водитель пулса таврăнать. Тĕрлĕ çĕрте хăйĕн профессийĕпе ĕçлесе тăрăшулăх кăтартать. Çав вăхăтрах çамрăк каччă пĕлĕве ÿстерсе пымаллине шута илет. Чăваш ял хуçалăх институчĕн механизаци факультетне вĕренме кĕрет. Çапла вара 1967-1972 çулсенче унта пĕлÿ пухать, инженер пулма хатĕрленет.
Мичурин ячĕпе хисепленекен колхоз председателĕ, Социализмла Ĕç Геройĕ С.Лукин ăна тăван хуçалăха таврăнма сĕнет. Çапла вара 1972 çулхи август уйăхĕнче вăл ялта тĕп инженерта ĕçлеме пуçлать. 18 çул пĕр улшăнмасăр вăй хурать.
Ял хуçалăх производствине аталантарас тата культура строительстви енĕпе тунă пысăк çитĕнÿсемшĕн 1976 çулхи ноябрь уйăхĕнче ăна РСФСР Верховнăй Совет Президиумĕ Хисеп грамотипе наградăлать. 1976 çулта тĕш тырăпа ытти ял хуçалăх продукчĕсене туса илессипе тата патшалăха сутассипе ÿстермелли плансемпе обязательствăсене пурнăçлас ĕçре хастарлăх кăтартнăшăн СССР Верховнăй Совечĕн Президиумĕн Указĕпе чи малта пыракансен ушкăнне ССР Союзĕн орденĕсемпе тата медалĕсемпе наградăланă. Вĕсем хушшинче Мичурин ячĕпе хисепленекен колхозăн главнăй инженерĕ Николай Никоноров та Хисеп Палли ордена тивĕçнĕ.
- Çав çулсенче тĕш тырăпа пăрçа йышши культурăсене кашни гектартан 32-35 центнертан кая илмен. Выльăх-чĕрлĕх продукчĕсем туса илес енĕпе те малта пынă. Выльăх апачĕ çулталăк çурăлăх хатĕрлеттĕмĕр. Ку енĕпе пирĕн ятарлă 3 комбайн пулнă. Ял хуçалăхĕнче тунă пысăк çитĕнÿсемшĕн Чăваш Республикин куçса çÿрекен Хĕрлĕ ялавне темиçе хутчен те çĕнсе илнĕ, - аса илет çав вăхăтсене Николай Никонорович.
Вăхăт малаллах шунă. Хуçалăх çĕнĕрен те çĕнĕ çитĕнÿсем тунă. 1982 çулта ăна «Чăваш АССРĕн ял хуçалăхĕн тава тивĕçлĕ ĕçченĕ» хисеплĕ ят параççĕ.
1987 çулхи июль уйăхĕнче РСФСР Верховнăй Совет Президиумĕ Никонорова «РСФСР ял хуçалăхĕн тава тивĕçлĕ инженерĕ» хисеплĕ ят парать. Кун пек пысăк награда илни районта халиччен пулман.
1989 çулхи февраль уйăхĕнче ăна колхоз председателĕ пулма суйлаççĕ. Колхозниксен шанăçне тÿрре кăларассишĕн хăйĕн мĕн пур пĕлĕвне, тăрăшулăхне парать. Район тата Кĕтеснер ял Совечĕсен депутачĕ пулнă май суйлавçăсен наказĕсене пурнăçа кĕртессишĕн нумай тăрăшать.
1993 çулта ĕçлеме район администрацийĕн ял хуçалăх управленине тĕп инженера куçать.
Кунта виçĕ çул ĕçленĕ хыççăн мĕн пенсие тухичченех элеваторта тĕп инженерта - производство начальникĕнче вăй хурать. Чăваш Республикин Ял хуçалăх министерстви ăна ял хуçалăх производствинче нумай çул тухăçлă ĕçленĕшĕн тата çуралнăранпа 60 çул çитнĕ ятпа Хисеп грамотипе наградăлать, парне парса чыс тăвать.
Мăшăрĕпе - Зоя Ивановнапа вĕсем 3 ача çуратса ÿстерсе пурнăç çулĕ çине кăларнă. Аслă хĕрĕ - Тоня Хусанти медицина институтне вĕренсе пĕтернĕ, халĕ Шупашкарта стоматологра ĕçлет. Вăталăххи, Ирина, педагогика институтĕнчен вĕренсе тухнă, Шупашкарта ĕçлесе пурăнать.
Сергей ывăлĕ Шупашкарта коопераци институтне вĕренсе пĕтерсе экономист специальноçне илнĕ, каярахпа кунтах юридици факультетне вĕренсе пĕтернĕ.