30 апреля 2009 г.
«Букварьтен илемлĕ литературăна çити» республикăри XII конкурсăн иккĕмĕш турне районти 6 шкултан 7 ача хутшăнма тивĕçлĕ пулнă: Чупайĕнчен - 1 ача, Аслă Чакран - 1, Пысăк Енккассинчен - 1, Кивĕ Вăрмартан - 2, Кĕтеснертен - 1, Тикаш шкулĕнчен - 1 ача. Конкурс ĕçне йĕркелесе пыраканĕ - Чăваш патшалăх университечĕн профессорĕ Г.Краснов.
Çамрăк çыравçăсем секцисемпе уйрăммăн ĕçлерĕç: проза, поэзи, драматурги, тĕрленчĕкпе очерк. Литература ăсталăхне алла илме кăмăллакансен йышĕ çултан çул ÿссе пынине палăртрĕç конкурса ертсе пыракансем. Кăçал республикипе 159 ача хутшăннă, конкурса 170 ĕç тăратнă. Хула шкулĕсенче вĕренекенсем те пур. Чи пултаруллисене палăртма, чи лайăх ĕçсене суйласа илме çăмăлах пулманнине асăнчĕ Чăваш патшалăх университечĕн доценчĕ В.Абрамов. «Кашни кунах аталантармасан талант типсе пырать. Çавăнпа та кашни кунах çырăр, темăсем тупма вĕренĕр, çĕнĕлĕхсем шырăр», - терĕ вăл. Г.Краснов писатель кашни çыннăн пурнăçĕнче чи хаклă çын учитель пулни çинчен каларĕ.
Конкурса пĕтĕмлетме Чăваш Республикин Вĕрентÿпе çамрăксен политикин министерствинче тата «Тантăш» хаçат редакцийĕнче ĕçлекенсем те пынă.
Г.Лебедев ячĕллĕ лицейра чăваш филологи класĕнче вĕренекенсем Н.Айзманăн «Ăçта-ши ман атте;» пьесине питĕ ăста та пултаруллă выляса кăтартрĕç.
Конкурса пĕтĕмлетнĕ хыççăн проза, поэзи, очерк номинацисенче районти шкул ачисем те палăрчĕç. «Проза» номинацире Тикашри пĕтĕмĕшле пĕлÿ паракан тĕп шкулти 7-мĕш класра вĕренекен М.Кабакова 2-мĕш вырăна тивĕçлĕ пулчĕ. «Очерк» номинацире - Аслă Чак шкулĕнчи К.Николаева - 3-мĕш вырăн, «Поэзи» номинацире Кивĕ Вăрмарти А.Казаков 3-мĕш вырăн йышăннă. Çĕнтерÿçĕсене пурне те дипломсемпе хаклă парнесем парса хавхалантарнă, вĕсене вĕрентекенсем те Тав хучĕсем илме тивĕçлĕ пулчĕç. «Тантăш»хаçатăн тĕп редакторĕ Г.Платонова хаçатпа тачă çыхăну тытнăшăн, унăн ĕçне хастар хутшăннăшăн вĕрентекенсене Хисеп грамотипе чысларĕ.
Кăçал ирттернĕ конкурсра пĕрремĕш хут çĕнтерÿçĕсенчен пĕр ачине «Орленок» лагере кайма путевка пачĕç.