22 апреля 2009 г.
Çуркунне çитсен, ялсенче вут-кăвар инкекĕ ытларах пулать. Пушарсем çурт-йĕре, пурлăха пысăк сиен кÿреççĕ. Вут-кăварта çынсем вилесси те пулкалать. Акă иртнĕ çул кăна 6 çын çунса вилнĕ. Кăçалхи виçĕ уйăхра район территорийĕнче 7 пушар тухнă, пĕр çын пурнăçĕ татăлнă. Инкексен сăлтавĕсене тишкерес-тĕк çакă курăнать: пушар вут-кăварпа асăрханусăр пулнипе, электропроводка юсавсăррипе, пĕчĕк ачасене пăхакансăр, хăйсене кăна пăрахса хăварнипе, ĕçлекен газ плитисене, çунакан кăмакана никамсăр хăварнипе, юсавсăр кăмакасенчен, ÿсĕрпе вырăн çинче пирус туртса выртнинчен тухать.
Пушара вăхăтра сÿнтерес, алхасма парас мар тесен пурин те пĕрле кĕрешни кирлĕ. Ку енĕпе пушар сÿнтермелли машинăсемпе анлăн усă курни, вĕсене яланах юсавлă тытни пысăк пĕлтерĕшлĕ. Районти пушар чаçĕнче халĕ пушар сÿнтермелли тăватă автомашина. Вĕсенчен иккĕшĕ - резервра, иккĕшĕ дежурствăра тăраççĕ. «Арабоси» агрофирмăра - 2, «Урмарская», «Шигали», «Вăтам Энĕш», Тикашри «Иванов В.А.» хресчен (фермер) хуçалăхĕсенче, Энĕшпуç ял тăрăхĕнче, элеваторта пушар машинисем пур. Вĕсенчен чылайăшĕ пушар сÿнтерме тухса çÿреççĕ.
Çав вăхăтрах Энтрияль, Пысăк Енккасси, Кавал, Мăнçырма, Кĕтеснер, Чулкас ял тăрăхĕсенче пушар машинисене йĕркеллĕ тытса тăрасси çине кирлĕ пек çаврăнса пăхмаççĕ, хăш-пĕр машинăсем çинче хуçисем те çуккă. Çакăнпа эпир нимĕнле те килĕшме пултараймастпăр.