15 апреля 2009 г.
- РОСТО (ДОССАФ) автошкулĕнче ĕçлеме пуçланăранпа кăçал 35 çул çитрĕ. Çак тапхăрта кунтан Раççей Çарĕпе халăх хуçалăхĕ валли пиншер специалист вĕрентсе хатĕрлерĕмĕр, - терĕ калаçăва пуçласа Вячеслав Михайлович Никитин.
Çĕнĕ Кавал ялĕнче çуралса ÿснĕскер 1968 çулта Вăрмарти вăтам шкултан вĕренсе тухнă. Пĕр вăхăт сĕтел-пукан фабрикинче вăй хурать. Пĕлĕве малалла ÿстерес, специальность туянас тĕллевпе Тутар Республикинчи Васильевăри автотранспорт техникумне вĕренме кĕрет. Вăхăт малаллах шунă. Иккĕмĕш курсра вĕреннĕ чухне ăна Совет Çарне илеççĕ. Чăваш каччи службăна Архангельск облаçĕнчи Мирный хулине лекет. «Плесецк» космодромра вăхăт сисĕнмесĕрех иртет. Кунтах вăл электромеханик специальноçне илет. Службăран демобилизаци йĕркипе таврăнсан техникумра вĕренĕве малалла тăсать. Техникума вĕренсе пĕтернĕ хыççăн çамрăк специалиста направленипе Хабаровск крайĕнчи Еврей автономи облаçĕнчи пĕр ялти автотранспорт предприятине ĕçлеме яраççĕ, эксплуатаци начальникне лартаççĕ. Тăрăшса вăй хурать, техникумра илнĕ пĕлÿпе практикăра анлăн усă курать. Кунта ĕçлеме тата пурăнма пур условисем те пулнă пулин те çуралнă тăван тавралăх ăна хăй патнех илĕртет. Çапла вара 1974 çулхи февраль уйăхĕнче вăл тăван киле таврăнать те Вăрмарти автошкулта ĕçлеме тытăнать. Малтан - производство вĕрентĕвĕн мастерĕнче, унтан - преподавательте.
Пĕр вăхăт хăйĕн пурнăçне çар службипе çыхăнтарать. Районти çар комиссариачĕ урлă Польшăна каять, автомобильсем юсакан заводра слесарьте ĕçлет. Унтан таврăннă хыççăн мĕн паян кунчченех РОСТО автошкулĕнче преподавательте вăй хурать.
- Халăх хуçалăхĕ валли ăста специалистсем хатĕрлес тĕлĕшпе Никитин преподаватель хăйĕн мĕн пур пĕлĕвне, ăсталăхне парать. Коллективра пысăк авторитетпа усă курать. Ĕçе тĕплĕн тума тăрăшать, çавăншăн ăна хисеплеççĕ, - ăшă сăмахсем калать ун çинчен автошкул пуçлăхĕ Г.Иванов.
Çĕршыври оборонăллă-массăллă уйăхлăх кăçал Шупашкар хулинчен пуçланчĕ. Çавна май республикăн тĕп хулине РОСТО Центральнăй Совечĕн председателĕ Ю.Камышанов генерал-майор тата Раççейĕн 25 регионĕнчен представительсем пухăнчĕç. Унта пирĕн район делегацийĕ те, вĕсемпе пĕрле В.Никитин та хутшăнчĕ. Çак хисепе вăл чăннипех те тивĕçлĕ.
Ĕçре ырă тĕслĕх кăтартнăшăн тата нумай çул тухăçлă ĕçленĕшĕн ăна «Совет Союзĕн виçĕ хут геройĕ А.И.Покрышкин» тата «ДОСААФа-80 çул» юбилей медалĕсемпе, нумай Хисеп грамотисемпе наградăланă. Вĕсене вăл хаклă реликви вырăнне хурса упрать.