11 апреля 2009 г.
1970 çулта Владимир Федорович Тихоновсем пурăнма Кавала куçса килеççĕ. Хăйĕн аса илĕвĕнче вăл 6-8 классенче класс руководителĕ пулнă Калерия Александровна Исаева ăна нумай предметсемпе вĕренме пулăшни, уйрăмах математикăна килĕштерни çинчен пĕлтерет. Физикăна вĕрентнĕ Виталий Гаврилович Гаврилов вара наукăсене алла илме хăнăхтарнă. Николай Васильевич Софроновпа (9 класс) Галина Петровна Шестакова (10 класс) класс руководителĕсем тăрăшнипе вăл пур экзаменсене те «пиллĕк» паллăпа тытать.
Шкулта ирĕклĕ майпа кĕрешме вĕрентекен пĕр тăван Николай Петрович тата физкультура учителĕ Иван Петрович Таратинсем уншăн тĕслĕх пулнă. Вĕсем пек пулас, пултаруллă спортсменсенчен вĕренес тесе 1972 çулта ирĕклĕ майпа кĕрешме вĕренекенсен секцине çÿреме тытăнать. Кавал шкулĕнче вĕренекенсем вĕсен тренерĕ Николай Петрович секцине çÿрекенсен ăсталăхне ÿстерессишĕн хăйĕн мĕн пур пĕлĕвне, тăрăшулăхне панине туйса илеççĕ. Тренер çине тăнипе В.Тихонов 1973-1974 çулсенче çамрăксем хушшинче район тата республикăри «Урожай» ирĕклĕ спорт обществин чемпионĕ пулса тăрать. Çавăн чухне ĕнтĕ Николай Петрович ăна пĕрремĕш разрядлă спортсменăн значокне парать.
1974 çулта Кавалти вăтам шкултан вĕренсе тухнă хыççăн вăл Шупашкарти И.Н.Ульянов ячĕллĕ патшалăх университечĕн электротехника факультетне вĕренме кĕрет. Кунта спортри ăсталăха ÿстерме условисем татах та лайăхрах. Чăваш Енре ирĕклĕ майпа кĕрешессине пуçарса янă, физкультурăпа спорт кафедрин заведующийĕ О.Маркиянов тата А.Абрамов аслă преподаватель патĕнче кĕрешÿ ăсталăхне малалла туптать. Университет командинчи М.Капитонов, пĕр тăван Сергейпе Михаил Егоровсем, Р.Алиулов, Л.Васильев, А.Ильин тата ытти хăш-пĕр студентсемпе пĕрле 1975-1979 çулсенче «Буревестник» ирĕклĕ спорт обществăн чемпионĕ ята çĕнсе илеççĕ.
Чăваш Республикинче ирĕклĕ майпа кĕрешме вĕрентес енĕпе чапа тухнă В.Клочков В.Тихонова В.И.Чапаев ячĕллĕ заводăн Спорт çуртне çÿреме ирĕк парать. Кунти пултаруллă спортсменсемпе тĕрлĕрен ăмăртусене тăтăшах хутшăнать. 1976 çулта спорт мастерĕн кандидачĕн нормине пурнăçлать. 1979 çулта В.И.Чапаева асăнса ирттернĕ Пĕтĕм Союзри турнирта - тăваттăмĕш тата 1979 çулта республикăри «Труд» ирĕклĕ обществăн чемпионатĕнче иккĕмĕш вырăнсене йышăнать. Ун чухне вăл 68 килограма яхăн таякан спортсменсемпе тупăшнă. Классика енĕпе кĕрешсе 1976, 1977, 1978 çулсенче Чăваш Республикин чемпионĕн ятне тивĕçет.
Чăваш патшалăх университетне вĕренсе пĕтернĕ хыççăн ăна лейтенант званийĕ параççĕ, часах Совет Çарне службăна илеççĕ. 1979-1994 çулсенче Инçет Хĕвел тухăçĕнчи Çар округĕнче авиаци чаçĕсенче тĕрлĕрен инженерипе техника должноçĕсенче пулать. Çав çулсенче Хабаровскри институтра физкультура уйрăмĕнче заочно вĕренет, «кĕрешÿ енĕпе тренер-преподаватель» специальноçне илет.
1994 çулта ăна Приморье крайĕнчи Черниговкăри авиаци полкĕнче физкультурăпа спорт енĕпе начальник должноçне лартаççĕ. 1996-2006 çулсенче - Уссурийскри авиаци дивизийĕнче физкультурăпа спорт начальникĕ.
Служба вăхăтĕнче вăл кашни гарнизонтах ирĕклĕ майпа кĕрешме вĕренекенсен секцине йĕркеленĕ. Унта çÿрекенсем нумай пулнă. Анчах та 1990-мĕш çулсен пуçламăшĕнче Хĕç-пăшаллă Вăйсенче спортăн çак енне списокран кăларнă. 1990-мĕш çулсен варринче РФ оборона министерствин спорт комитечĕ çар чаçĕсенче кире пуканĕ йăтассипе ăмăртусем епле ирттернине тĕрĕсленĕ. Çавăн хыççăн пирĕн ентеш - Владимир Федорович служба тивĕçĕпе кире пуканĕ йăтассин техникипе мелĕсене вĕрентме тытăнать. 2001 çулта Хабаровскри физкультурăпа спорт академийĕн аспирантурине вĕренме кĕрет. 2003 çулта кире пуканĕ йăтакан спортсменсем хатĕрлес енĕпе диссертаци хÿтĕлет, педагогика наукисен кандидачĕн ученăй степеньне илет.
2006 çулта вăл майор званипе запаса тухать. Уссурийск хулинчен Шупашкара куçса килет. Халĕ вăл университетри физкультурăпа спорт кафедрин доценчĕ. 2007 çулта ăна Пĕтĕм Раççейри кире пуканĕн спорт федерацийĕн ĕçтăвком членĕ пулма суйланă, наукăпа методика комиссийĕн председателĕ. 2008 çулта кире пуканĕн спорчĕ енĕпе Раççей пĕрлештернĕ командин тренерĕсен составне кĕртнĕ. Хальхи вăхăтра педагогика наукисен докторĕ О.Маркиянов профессор ертсе пынипе спортăн тĕрлĕ енĕпе ирттерекен наука тĕпчевĕсене хутшăнать.