08 апреля 2009 г.
Кивĕ Вăрмар районти чи пысăк ялсенчен пĕри. 539 кил шутланать кунта, 1598 çын пурăнать. Ялти çыхăну уйрăмне 1000 экземпляр ытла тĕрлĕрен хаçат-журнал килсе тăрать. Куратпăр ĕнтĕ, кашни киле икшер экземпляра яхăн издани лекет. Хăйсен юратнă хаçачĕсене подписчиксем патне çыхăну уйрăмĕнчи виçĕ Людмила çитерсе параççĕ: Людмила Сереброва пуçлăх, Людмила Максимовапа Людмила Алексеева - почтальонсем. Хаçат-журнал çырăнса илекенсем вĕсен тăрăшулăхĕпе кăмăллă.
- Çамрăк чухне Анфиса Владимирова почтальона чăтаймасăр кĕтеттĕмĕр. Хаçат-журналсемсĕр пуçне, çырусем ытларах савăнтарнă пире. Хамăр та хуравне памасăр юлман ĕнтĕ. Эпĕ почтальон ĕçне кăмăллаттăм. Тен çавăнпах та пулĕ, хамăн ĕçе почтăпа çыхăнтартăм. Ку вăл 2002 çулхи декабрь уйăхĕнче пулчĕ, - кăмăллăн каласа парать Людмила Аркадьевна Максимова.
Унтанпа кĕçех 7 çул çитет. Çак тапхăрта вăл ĕçе вĕренсе пычĕ, самаях опыт пухрĕ, ял çыннисемпе пĕр чĕлхе тупма пĕлчĕ. Ĕçе юратса пурнăçланипе Макаркасси, Уйкас, Виçпÿрт, Туçи кассисенче пурăнакансем умĕнче пысăк авторитет çĕнсе илнĕ. Ăна шанаççĕ, ĕненеççĕ. Çавна май хаçат-журналпа туслашакансен йышĕ те ÿссех пырать.
- Эпĕ ĕçлеме пуçланă çулхине районта тухса тăракан «Хĕрлĕ ялав» хаçат Кивĕ Вăрмарти çыхăну уйрăмне мĕн пурĕ те 130 экземпляр кăна килсе тăратчĕ. Халĕ вара манăн участокра кăна район хаçатне 140 килте илсе тăраççĕ. Юлашки çулсенче район хыпарçи интереслĕрех тухма пуçларĕ, çавăнпа ăна вулакансем юратса çырăнаççĕ. Хаçат-журнал çырăнтармалли кампани пуçлансан эпĕ чи малтанах Виталий Алексеев рабочине çырăнтаратăп. Унăн алли çăмăл. Çапла вара çырăнтару кампанийĕ кашни çулах ăнăçлă иртет. Хур ферминче ĕçлекен В.Григорьевапа А.Герцен, Ю.Феоктистова тата ытти хăш-пĕр çынсем темиçешер экземпляр хаçат-журнал илсе тăраççĕ. Хаçата çырăнса илекенсем хушшинче фабрика руководителĕсемпе специалисчĕсем, кайăк-кĕшĕк пăхакансем, учительсем, культурăпа медицина ĕçченĕсем, пенсионерсем уйрăмах йышлă, - калаçăва малалла тăсать Максимова почтальон.
Çыхăну уйрăмĕ «Урмарская» кайăк-кĕшĕк фабрикин дирекцийĕпе тачă çыхăну тытать. Пĕр-пĕринпе туслă пурăнни пулăшать ĕнтĕ вĕсене подписка ыйтăвне йĕркеллĕ татса пама. Хуçалăх дирекцийĕ коллектив членĕсем район тата республика хаçачĕсене илсе тăма пултарччăр тесе майсем туса парать.
- Район тата республика хыпарĕсене пĕлсе тăмасăр мĕнле пултăр вăл хальхи саманара. Кашниех пурнăç уттипе тан пытăр. Хаçатран тĕрлĕ хыпарсене вуласа пĕлнипе пĕрлех, хăйĕн шухăшне те çырса пĕлтертĕр, коллективри лару-тăрупа паллаштартăр, çитменлĕхсен сăлтавĕсене уçса кăтарттăр, куçран калатăр, çавăн чухне район хаçачĕн витĕмлĕхĕ татах та ÿсĕ, - хăйĕн шухăшне уçса парать хуçалăх пуçлăхĕ Николай Петрович Петров.
Л.Максимова почтальонăн сумкки пĕрре те çăмăл мар. 500 ытла тĕрлĕрен хаçат-журнал салатать вăл ял халăхне. Кунне миçе çухрăм утма лекмест-ши ăна? Анчах та вăл «ырă ĕç тăвакан çын нихçан та ывăнмасть», тенĕ ваттисен сăмахĕсене ялан асра тытать. Çакă ăна ĕçре хавхалантарать те ĕнтĕ. Пурнăç шăпи çапла килсе тухнишĕн вăл пĕрре те кулянмасть, савăнать кăна. Хусанти ветеринари институтĕнчен вĕренсе тухнă хыççăн пĕр вăхăт кайăк-кĕшĕк фабрикинче селекционер пулса ĕçленĕ, ытти ĕçсене пурнăçланă. Каярахпа вара хăй килĕштернĕ ĕçе суйласа илнĕ. «Кашни киле-хаçат-журнал» - çапла тĕллев лартнă вăл хăйĕн умне. Ял çыннисем район хыпарĕсене пĕлсе тăччăр тесе «Хĕрлĕ ялав» хаçата ытларах сарасси çине пысăк тимлĕх уйăрать. Ку енĕпе районти почтальонсем хушшинче ырă тĕслĕх кăтартать.
Мăшăрĕпе - Алексей Николаевичпа вĕсем икĕ ывăл çитĕнтереççĕ. Саша - саккăрмĕш, Дима вунпĕрмĕш класра вĕренеççĕ. Çамрăксем ашшĕ-амăшне тĕрлĕ ĕçсем тума пулăшаççĕ.
- Кивĕ Вăрмарти çыхăну уйрăмĕ районта лайăххисен шутĕнче. Унта вăй хуракан Людмилăсем плансене пур енĕпе те ăнăçлă пурнăçласа пыраççĕ, хăйсен хастарлăхĕпе палăрса тăраççĕ, çавăншăн вĕсене ял-йыш хисеплет, - пĕлтерет районти почтамт начальникĕ Сергей Иванович Риманов.