08 апреля 2009 г.
Районти культурăпа кану центрĕнче «Çулталăк вĕренекенĕ - 2009» конкурсăн 2-мĕш тапхăрĕ иртрĕ. Асăннă конкурсăн пĕрремĕш тапхăрĕнче шкулсенче 8-11 классенче вĕренекенсем хăйсене тĕрлĕ енлĕн кăтартса финала тухма пултарнă. Шкулсенче çĕнтерсе район шайне тухнă 16 финалистсенчен жюри шкул, район, республика, Раççей шайĕнчи конкурссемпе олимпиадăсенче, конференцисемпе ăмăртусенче хутшăннине шута илсе вĕсенчен чи маттур вĕренекенсене О.Владимирована (Чулкас шкулĕ, 9 класс), Г.Павлова (Шăхаль шкулĕ, 9 класс), А.Петрована (Аслă Чак шкулĕ, 9 класс), Н.Павлована (Энĕшпуç шкулĕ, 10 класс), К.Егорована (Чупай шкулĕ, 9 класс), А.Казакова (Кивĕ Вăрмар шкулĕ, 11 класс), И.Шмелевана (Вăрмарти 1 " шкул, 10 класс), Т.Степанована (Пысăк Енккасси шкулĕ, 10 класс) финала хăварнă. Мартăн 31-мĕшĕнче районти культурăпа кану центрĕн сцени çинче «Çулталăк вĕренекенĕ-2009» конкурсăн финалĕ иртрĕ. Финалистсем хăйсен ăсталăхĕпе пултарулăхне кăтартас тĕллевпе тĕрлĕ конкурссем витĕр тухрĕç. Вĕсем «Визитка», «Эпĕ ташлатăп тата юрлатăп», «Манăн хобби» конкурссенче тупăшрĕç. Кашни конкурсант залра ларакансем умĕнче хăйĕн пултарулăхне пур енлĕн уçса пама тăрăшрĕ. Çавăнпа та жюри членĕсене вĕсене тивĕçлĕ хак пама та йывăр пулчĕ. Райадминистрацин вĕрентÿ тата çамрăксен политикин пайĕн тĕп специалист-эксперчĕ Н.Иванова конкурса пĕтĕмлетрĕ.
Çĕнтерÿçĕ ятне Г.Е.Егоров ячĕллĕ Вăрмарти пĕрремĕш вăтам шкулта 10 класра вĕренекен И.Шмелева илме тивĕç пулчĕ.