04 апреля 2009 г.
Культура ĕçченĕн уявне халалласа районти культурăпа кану центрĕнче «Чи лайăх культура ĕçченĕ - 2009» конкурс иртрĕ. Унта районти культура учрежденийĕсенче вăй хуракан 8 участник хутшăнчĕ: Н.Яковлев (Пысăк Енккассинчи культура çурчĕн директорĕ), М.Кузьмина (Çĕнĕ Кавалти клуб заведующийĕ), Н.Захарова (Вăтакасри клуб заведующийĕ), С.Павлова (районти культурăпа кану центрĕн халăх театрĕн режиссерĕ), Л.Ломоносова (Кĕтеснерти культура çурчĕн директорĕ), Е.Иванова (Анаткасри клуб заведующийĕ), Л.Егорова (Атайкассинчи клуб заведующийĕ), Г.Андриянова (Аслă Чакри культура çурчĕн директорĕ).
Конкурсăн тĕп тĕллевĕ - талантлă, професси тĕлĕшĕнчен пысăк ăсталăхпа палăрса тăракан культура ĕçченĕсене палăртасси, творчествăлла активлăха ÿстересси, анлăлатасси. Çавна май хăйсен ăсталăхне палăртас тĕллевпе вĕсен тĕрлĕ конкурссем витĕр тухма тиврĕ. Культура ĕçченĕсем «Чи лайăх инноваци проекчĕ», «Эпĕ чи пултарулли», «Афишăсем йĕркелесси», «Çăлтăр пул» тата ытти тĕрлĕ конкурссенче хăйсен пултарулăхне пур енлĕн кăтартрĕç. Залра ларакансемпе те тĕрлĕ вăйăсем, викторинăсем ирттерчĕç. Çавăнпа та жюри членĕсене вĕсене тивĕçлĕ хак пама та йывăр пулчĕ. Райадминистрацин вĕрентÿ тата çамрăксен политикин пайĕн начальникĕ Ю.Соколов, жюри председателĕ пулнă май, уяв ячĕпе саламласа конкурса пĕтĕмлетрĕ.
Пĕрремĕш вырăна районти культурăпа кану центрĕн халăх театрĕн режиссерĕ С.Павлова тивĕçрĕ. Ăна дипломпа наградăларĕç тата тĕслĕ телевизор парнелерĕç. Иккĕмĕш вырăна Çĕнĕ Кавалти клуб заведующийĕ М.Кузьмина тухрĕ. Унăн «Арапуç ял тăрăхĕнче этнокультура центрĕ йĕркелесси» инноваци проектне чи лайăххисен йышне кĕртрĕç. Пултаруллă та маттур М.Кузьмина культура ĕçченĕ диплома тата сумлă парнене пылесоса тивĕçрĕ. Кĕтеснерти культура çурчĕн директорĕ Л.Ломоносова виççĕмĕш вырăн çĕнсе илчĕ. Конкурса хутшăннă кашни культура ĕçченĕ тĕрлĕ номинацисенче палăрчĕ.
Пĕтĕмĕшле каласан жюри членĕсем те, курма килнисем те вĕсен пултарулăхĕпе, ăсталăхĕпе кăмăллă пулчĕç.