01 апреля 2009 г.
Çурхи ака-суха ĕçĕсен планĕпе килĕшÿллĕн хĕрÿ ĕççине 8-10 кунта вĕçлемелле. Тĕш тырăпа пăрçа йышши культурăсене 1200 гектар çине пысăк пахалăхпа, элитлă вăрлăхпа кăна акса хăвармалла. Кăçал валли 190 тонна элита тĕш тырă вăрлăхĕ туяннă. Çав шутра «Красноуфимская», «Эстер» çурхи тулăсем, «Эльф» урпа. Минераллă удобренисем, сĕрмелли-çунтармалли япаласем кирлĕ чухлĕ кÿрсе килнĕ. Сÿресене тахçанах хатĕрлесе хунă. Культиваторсене юсаса пĕтернĕпе пĕрех. Ку енĕпе Н.Белов, Н.Петров, Г.Силеров, Г.Эверсков слесарьсемпе механизаторсем тăрăшулăх кăтартрĕç. Г.Судюков, В.Григорьев, В.Матвеев, С.Архипов механизаторсем сеялкăсене тепĕр хут тĕрĕслесе тухаççĕ. Çĕр хатĕрленĕ çĕрте КПС-4 йывăр сÿресемпе икĕ агрегат, пĕрлештернĕ культиваторсемпе 4 агрегат хире тухмалла.
Акана пурĕ 9 агрегат хутшăнать. ДТ-75 тракторпа виçĕ сеялкăллă пĕр агрегат пулать. Ыттисем МТЗ-80, МТЗ-82 тракторсемпе. Механизаторсем ăçта тăрăшмаллине тата мĕнле ĕç пурнăçламаллине пĕлсе тăраççĕ. Сăмахран, В.Васильевпа А.Никитин механизаторсене сÿре агрегачĕсем çирĕплетсе панă. Культиваци тунă çĕрте Н.Петров, Г.Силеров, О.Григорьев, И.Николаев механизаторсем вăй хурĕç. Тĕш тырăпа пăрçа йышши культурăсен вăрлăхне минераллă удобренисемпе хутăштарса А.Клементьев, Г.Судюков, С.Николаев, В.Григорьев, Н.Петров, Д.Войков, А.Никитин механизаторсем кĕске вăхăтра акса хăварĕç. «Çурхи кун çулталăк тăрантарать» тенине асра тытса механизаторсем ĕççин кашни минучĕпе туллин усă курĕç. Çур акине хутшăнакансене апата вырăна тухса çитерессине йĕркелетпĕр.