28 марта 2009 г.
Ял хуçалăх производство кооперативĕсен, хресчен (фермер) хуçалăхĕсен, ял хуçалăхĕпе çыхăннă предприятисемпе организацисен, учрежденисен руководителĕсемпе, хула тата ял тăрăхĕсен пуçлăхĕсемпе, Раççей Перекет тата Ял хуçалăх банкĕсен представителĕсемпе ирттернĕ канашлăва Чăваш Республикин Министрсен Кабинечĕн Председателĕн заместителĕ - ЧР Ял хуçалăх министрĕ М.Игнатьев хутшăнчĕ. Канашлăва район пуçлăхĕ В. Кириллов уçрĕ, вăлах ертсе пычĕ.
Канашлăвăн кун йĕрки: «АПК аталанăвĕ» приоритетлă наци проектне пурнăçа кĕртес тĕлĕшпе малалла пурнăçламалли тĕп çул-йĕрсем».
Ку ыйтупа район пуçлăхĕн заместителĕ - райадминистрацин ял хуçалăхĕпе экологи, çĕрпе пурлăх пайĕн начальникĕ Л.Петров тухса калаçрĕ.
- Иртнĕ çула эпир начар мар кăтартусемпе вĕçлерĕмĕр. Тĕш тырă культурисем туса илес енĕпе республикăри районсем хушшинче малтисен ретне тухрăмăр. Выльăх-чĕрлĕх ĕрчетессипе те лайăххисен шутĕнче. Тунă ÿсĕмсемпе пĕрлех, кăçал татах та пысăкрах çитĕнÿсем тăвассишĕн кĕрешмелле. Çур акине тĕплĕн хатĕрленсе чылай ĕçсем туса ирттертĕмĕр. Çав вăхăтрах районта усă курмасăр выртакан çĕр лаптăкĕсем тата 5718 гектар пур. Вĕсене икĕ çулта сухалса-акса хăварма тытăнмалла, - терĕ Леонид Иванович.
Канашлура «Выльăх-чĕрлĕх чирĕсемпе кĕрешекен Вăрмарти станци» патшалăх учрежденийĕн начальникĕ П.Порфирьев, ЧР «Чăваш Республикин Апат-çимĕç фончĕ» унитарлă предприятин директорĕ Ю.Федоров, ЧР «Россельхозцентр» руководителĕн заместителĕ О.Белова, «Россельхозбанк» уçă акционерлă обществăн Чăваш регион филиалĕн директорĕ И.Письменская, Раççей Перекет банкĕн Чăваш Енри филиалĕн кредит пайĕн начальникĕ А.Петров, райадминистрацин строительство тата обществăлла инфраструктура аталанăвĕн пай начальникĕ А.Тихонов, Вăрмар районĕнчи ял хуçалăх производствине аталантарас енĕпе ĕçлекен тĕп специалист-эксперт В.Ефремова, «Пучах» хресчен (фермер) хуçалăхĕн пуçлăхĕ С.Калягин тухса калаçрĕç.
М.Игнатьев министр чылай ыйтусем çине хуравларĕ. «Финанс кризисне пăхмасăр патшалăх хуçалăхсене çурхи уй-хир ĕçĕсене ирттерме, яла аталантарма укçа-тенкĕ сахал мар уйăрса пулăшать. Ял хуçалăх продукцине туса илессине ÿстерес тата усă курман çĕрсене пусă çаврăнăшне кĕртес енĕпе сирĕн те ĕçлемелли чылай. Кăçал сирĕн районта Республика кунне ирттерме палăртнă май кашниех яваплăха ÿстерни кирлĕ», - терĕ Михаил Васильевич хăйĕн сăмахне вĕçлесе.
Канашлăва В.Кириллов пĕтĕмлетрĕ. Çурхи уй-хир ĕçĕсене йĕркеллĕ ирттерес, ял хуçалăх пĕлтерĕшлĕ çĕрсемпе туллин усă курас, выльăх-чĕрлĕхе ăнăçлă хĕл каçарас ыйтусем çинче чарăнса тăчĕ.