18 марта 2009 г.
Март хĕвелĕпе пĕрле çур ăшши те килсе çитрĕ. Хĕвел те хăйĕн пайăркисене çуттăнрах ялкăштарать, ăшшине те çĕр çине ытларах сапалать. Ку - хĕле ăсатма çитнин палли.
Уява ял халăхĕ йышлă пуçтарăннă. Яланхи пекех, спорт ăмăртăвĕсемпе интересленекенсем, унта хутшăнма кăмăл тăвакансем питĕ нумай. Пăхса тăнăçем черчен те çепĕç алăллă хĕрарăмсем арçынсенчен пĕрре те кая юлманни курăнать, мĕншĕн тесен 16 килограмм кире пуканне çĕклесси те, вутă татасси те, алă вăйĕ виçесси те, канат туртасси те - ним те хăратмасть чăваш хĕрарăмне.
Шăнкăрав çакнă, тутăрсемпе илемлетнĕ лашасемсĕр хĕл ăсатнин мĕн илемĕ пултăр! Ача-пăчапа çамрăксенчен çуна çине ларса ял йĕри-тавра çаврăнмасăр никам та юлмарĕ пуль. Ăмăртусенче I-III вырăнсене çĕнсе илнĕ хĕрарăмсене (канат туртассипе З.Родионова, А.Егорова, Н.Шавырина команди - 1-мĕш вырăн, вутă татассипе 1-мĕш вырăнта Е.Васильева, 2-мĕш - Л.Романова, 3-мĕш - Т.Трофимова, кире пуканĕ йăтассипе - 1-мĕш - В.Тимофеева, 2-мĕш - Н.Шавырина, 3-мĕш - Л.Романова) Хисеп грамоти тата укçан парса хавхалантарчĕç. Лаша хуçисем А.Егоров, А.Иванов, К.Игнатьев икшер михĕ тырăллă пулчĕç.
Уяв ирттерме спонсор пулса ял тăрăхĕн администрацийĕ, «Павлов Вячеслав Федорович» КФХ, «Мечта» лавкка тытакан И.Иванова предприниматель, Вăрмарти «Автомойка» начальникĕ С.Афанасьев пулăшрĕç.
Хĕрарăмсен уявĕ малалла культура çуртĕнче «Хĕрарăмсем - маттур хунямасем» конкурспа тăсăлчĕ.
«Ăçтан-ха пĕр çынрах çавăн чухлĕ вăй-хал» тени конкурса хутшăннă хĕрарăмсене - пурнăçри хунямасене - курсан шухăша ярать. Мĕнле ĕç пурнăçлама сĕнместĕн - хунямасем маххă памаççĕ. Тăватă хуняма хутшăнчĕ тупăшăва: З.Васильева, Э.Кузнецова, Г.Левина, Н.Филиппова. Тĕрлĕрен тупăшу витĕр тухрĕç конкурсантсем: хăйсемпе паллаштарчĕç, спортпа туслă пулнине, хуçалăхра хĕрарăм ĕçĕсене çеç мар, арçын ĕçĕсене те тума пултарнине, апат-çимĕç хатĕрлеме, юрă-ташăра артистран та кая мар ăста пулнине кăтартрĕç.
Пĕринчен тепри маттур хунямасене тĕрлĕ номинацире палăртрĕç: Н.Филиппова - «Пурнăç курнă хуняма», З.Васильева - «Спортпа туслă хуняма», Г.Левина - «Эрудит хуняма», Э.Кузнецова - «Çамрăк хуняма». Вĕсене грамотăсем тата парнесем парса чысларĕç. Чăннипех те савăнтарчĕç хĕрарăмсем хăйсен юрри-ташшипе, тĕлĕнтерчĕç хăйсен пултарулăхĕпе.