18 марта 2009 г.
Владимир Васильевич Александров Хуруй ялĕнче 1960 çулта çуралнă. Ялти шкултан вĕренсе тухсан, Шупашкарти профессипе техника училищине вĕренме кĕрет, специальноç илсен агрегат заводĕнче ĕçлет.
1979-1981 çулсенче Совет Çарĕн ретĕнче службăра тăрать, яла таврăнсан рабочире вăй хурать. Унтан Чăваш патшалăх университетĕнче экономика факультетĕнче вĕренет. 1986 çултан пуçласа паянхи кунчченех унăн ĕçĕ-хĕлĕ хамăр районпа çыхăнать: районти агропромышленность ревизорĕ, тĕп ревизорĕ, хуçалăхсем хушшинчи «Урмарская» строительство организацийĕнче тĕп бухгалтер, район администрацийĕн планпа экономика управленийĕн начальникĕ, район администрацийĕн пуçлăхĕн финанспа экономика ыйтăвĕсемпе ĕçлекен заместителĕ, 1994 çулхи декабрь уйăхĕнче В.Александрова район администрацийĕн пуçлăхне лартаççĕ, 1996 çулхи декабрь уйăхĕнче район халăхĕ ăна район самоуправлени пуçлăхне суйланă, 1998 çулта Чăваш Республикин Патшалăх Канашĕн депутачĕ пулма суйлаççĕ, 2000 çулта Мускаври патшалăх социаллă университетăн филиалне вĕренсе пĕтерсе юрист специальноçне илнĕ, 2003 çулхи март уйăхĕнчен пуçласа «Чăвашхлебопродукт» патшалăх унитарлă предприятин Вăрмарти тырă йышăнакан пункт директорĕ.
Владимир Васильевич хăйĕнчен çирĕп ыйтакан, пурнăçри йывăрлăхсене çĕнтерсе пыма пултаракан, палăртнă тĕллевсене пурнăçласа пырса малалла талпăнакан çын. Хресчен çемйинче çуралса ÿснĕскер мĕн пĕчĕкренех çĕр ĕçĕпе пиçĕхсе ÿснĕ. Çу кунĕсенче тулли пучахлă уй-хирте, çĕр улми пуссинче сахал мар тар кăларнă. Çамрăклах ĕçе юратни район халăхĕшĕн тăрăшма хистет те ĕнтĕ ăна. Саманан йывăр тапхăрĕнче ертсе пычĕ вăл района. Ку вăхăтра ĕç укçипе ачасене паракан пособисене те илеймен тĕслĕхсем пулнă. Темле йывăр ыйтусемпе те пынă ун патне район халăхĕ. Çапах та çамрăк ертÿçĕ пурин валли те ăшă сăмах, тимлĕх тупма пултарнă, кăткăс ыйтусене татса панă.
Хальхи вăхăтра вăл «Чăвашхлебопродукт» патшалăх унитарлă предприятин пирĕн районти тырă йышăнакан пунктне ертсе пырать. Ку хушăра предприяти чылай ĕçсем туса ирттернĕ. Ĕç калăпăшĕ те çулсерен ÿссе пынă. Тырă йышăнакан пункт «Чăвашхлебопродукт» патшалăх унитарлă предприяти çумĕнче тăрать терĕмĕр. Апла пулсан кунта пахалăхлă продукци кăна сутаççĕ. Сăмахран 2008 çулта Мускавра иртнĕ «Наци Мухтавĕ» выставкăра тата «Пĕтĕм Раççейри марка. XXI ĕмĕрти пахалăх палли» конкурса хутшăнса «Раççейри чи лайăх арман» ята тивĕçнĕ. Вĕсем çак ята тивĕçнинче пирĕн районти тырă йышăнакан пунктăн тÿпи пурах ĕнтĕ. Предприятире виçĕ суту-илÿ точки ĕçлет: «Колосок», «Пучах», «Нива». Вĕсем пурте «Раççейри чи лайăх арман» ята тивĕçнĕ пахалăхлă çăнăхпа ытти продуктсене сутаççĕ. Унсăр пуçне предприяти складĕнчен те суту-илÿ тăваççĕ, заказпа районти ялсене те турттарса параççĕ. Кунтан-кун халăх ыйтăвне тивĕçтерессишĕн тăрăшаççĕ. Юнашар районсенчи тĕрлĕ предприятисемпе, организацисемпе таччăн çыхăнса килĕшÿпе ĕçлеççĕ. Сăмахран, Тăвай, Сĕнтĕрвăрри, хамăр района, шкулсене, ача сачĕсене, больницăсене, пекарньăсене тата ыттисене те хăйсен продукчĕсемпе тивĕçтереççĕ. Вĕсен хакĕсемпе паллашма сĕнетпĕр. Çакăнта палăртнă продукцисем пурте Раççей Патшалăх стандартне тивĕçтереççĕ. Вĕсен хакĕсем те рынока тăратнă хаксемпе килĕшсе пыраççĕ. 2008 çулта предприятисенчи таварсен сутнинчен пурĕ 35 миллион та 514 пин тенкĕлĕх укçа тунă. Тавар лайăх сутăнни, халăх ăна хаваспах туянни предприятире ĕçчен те пултаруллă çынсем ĕçленине палăртать. Вĕсене кризис та пырса тĕкĕнмĕ. Çапла пултăрччĕ те. Ĕçлесе укçа тума пĕлнипе пĕрлех канма та пĕлеççĕ кунта вăй хуракансем. Вĕсем спортпа та туслă. «Чăвашхлебопродукт» патшалăх унитарлă предприяти тăтăшах спорт мероприятийĕсем ирттерет. Районти тырă йышăнакан пункт ĕçченĕсем унта хаваспах хутшăнаççĕ. Акă, нумаях пулмасть пĕрремĕш вырăна тухса предприятин куçса çÿрекен кубокне çĕнсе илчĕç. Тĕрлĕ ушкăнсенче кашни уйрăмшарăн чупса тата эстафетăра ăмăртса 7 комплект йĕлтĕр çĕнсе илчĕç. Спорт вĕсене ĕçре пулăшса пырать, коллективри туслăха та çирĕплетет.